VOV4.Sêdang - Kŏng ti on tơhrik Dak Lak nếo tơkŭm po diâp 4 toăng hngêi tuăn pâ ăm mâu rơpŏng pá puât a cheăm Ea Ktur, tơring Čư Kuin, cheăm Čư Kpô, tơring Krông Ƀúk ƀă cheăm Ea Ƀông, tơring Krông Ana. Rêm toăng hngêi châ kŏng ti tŏng kum 60 rơtuh liăn, rơpŏng ƀă mâu kơvâ cheăm veăng tơlo hâi pêi cheăng ƀă liăn ngân vâ mơjiâng kân lĕm rơdâ tiô tơdroăng kal vâ xúa.

PC Dak Lak diâp hngêi tuăn pâ ăm rơpŏng nâ H’Nuyn Êban

Mot tung toăng hngêi nếo, nâ H’Nuyn Êban, ối a ƀuôn Jung A, cheăm Ea Ktur, tơring Čư Kuin, rơrêk tung hiâm mơno:

“Á phiu ro xua ing kố hiăng ai hngêi nếo ối. Hdrối nah, rơpŏng á ối pơtân a hngêi xi kơchoh, nôkố ôh tá tô tuăn drêng kong mêi lơ kong tô. Á mơnê mâu khu râ hên hiăng mơjiâng pro hngêi ăm rơpŏng á’’.

Rơtế ƀă mơjiâng diâp hngêi, PC Dak Lak ối diâp rêm rơpŏng 1 toăng tơvi 40inch ƀă mâu tơmeăm on tơhrik

Pôa Trần Văn Thuận, Kăn pơkuâ Kŏng ti on tơhrik Dak Lak, tối ăm ‘nâi, thăm pêi pro tơdroăng tŏng kum pơlê pơla klăng leh tơbâ 45 hơnăm mơjiâng kŏng ti, tung hơnăm kố, rơtế ƀă mâu tơdroăng diâp kơxuô tơmeăm ăm mâu khu ki hbrâ mơdât pơreăng, veăng tơlo liăn hbrâ mơdât COVID-19…, kŏng ti ối tŏng kum lối 400 rơtuh liăn vâ mơjiâng 6 toăng hngêi tuăn pâ kum mâu rơpŏng pá puât.

A Sa Ly tơplôu ƀă tơbleăng