VOV4.XơĐăng - Kơxê lơ 28/12, a pơlê kong kơdrâm Ƀuôn Ma Thuột, Kŏng ti On tơhrik Dak Lak hiăng tơkŭm po leh tơbâ 45 hơnăm mơjiâng (28/12/1976 - 28/12/2021) ƀă tơdah xo Ƀâng khĕn kơdeăn dêi Ngế pro xiâm hnê ngăn Chin phuh. Tơkâ luâ 45 hơnăm mơjiâng ƀă mơnhông, troh nôkố PC Dak Lak dế rak ngăn mơ’no lối 450 km troăng kơxái 110kV; lối 4 rơpâu km troăng kơxái trung áp; 6.200 tíu ki krâ biến áp; kum ‘no on tơhrik ăm lối 574 rơpâu ngế kuăn pơlê a Dak Lak, châ vâ chê 100% pơ’leăng mâ mơngế ai on tơhrik xúa. Hơnăm kố, maluâ pơreăng COVID-19 tâ tú, pro ôh tá tơniăn, kŏng ti xuân ối châ xo kơxô̆ liăn lối 3.260 rơtal; nâp ăm tơnêi têa 50 rơtal.

Diâp ƀâng khê̆n kơdeăn dêi Ngế pro xiâm hnê ngăn Chin phuh

Pakĭng hnoăng cheăng mơjiâng pro tê mơdró, PC Dak Lak hiăng ai hên mâu tơdroăng cheăng tŏng kum rêh ối pơlê pơla, pêi pro troh tơdroăng ki kum kuăn pơlê. Bu tung 5 hơnăm achê kố, Kŏng ti hiăng ‘măn lối 3,6 rơtal liăn ăm hnoăng cheăng pơlê pơla a kong pơlê. Krê tung hơnăm 2021, tâi tâng kơxô̆ liăn pêi pro hnoăng cheăng kố châ lối 880 rơtuh liăn. Drêng tơbâ 45 hơnăm hâi mơjiâng, PC Dak Lak hiăng phiu ro châ Ngế pro xiâm hnê ngăn Chin phuh diâp ăm ƀâng khĕn kơdeăn.

Katarina Nga tơplôu ƀă tơbleăng