VOV4.Sêdang - Kơhnâ tung veăng tơdjuôm ivá hbrâ mơdât pơreăng ƀă veăng kum tơdroăng xơpá ƀă kuăn pơlê, tung pơla hdrối kố nah, Kŏng ti On tơhrik Dak Nông hiăng pêi pro kơdroh yă on tơhrik ăm mâu ngế ki tro tơdjâk ing pơreăng COVID-19 ƀă tâi tâng kơxô̆ liăn vâ chê 1,4 rơtal liăn.

PC Dak Nông hbru phái ăm vâi krâ nhŏng o a tơring Dak Song

Kŏng ti xuân hiăng tơbleăng hên tơdroăng pêi pro vâ tŏng kum kuăn pơlê, môi tiah: veăng tơlo liăn tŏng kum ăm Khu râng liăn vaccine 200 rơtuh liăn; diâp kế tơmeăm ƀă kế xúa tung khăm pơlât ăm mâu tíu pêi cheăng gâk hbrâ mơdât pơreăng; pêi pro pong têa kloh ăm Hngêi trung râ má môi Nguyễn Bá Ngọc ƀă hên ki ê.

Droh rơtăm kơvâ on tơhrik hbru kế tơmeăm ăm tíu gak hbrâ mơdât pơreăng

Châ ‘nâi tâi tâng kơxô̆ liăn ki PC Dak Nông tơkŭm po mâu tơdroăng tŏng kum rêh ối pơlê pơla, kum kuăn pơlê tung pơla hdrối kố nah lối 500 rơtuh liăn.

Katarina Nga tơplôu ƀă tơbleăng