VOV4.Xơ Đăng - Kơxo lơ 1/12, a mâu kong pơlê peăng Tơdế Tơnêi têa kong mêi hiăng prăng, têa mêi a mâu têa kroăng dế hiăng vâ xiâ. Kong mê têa kân hiăng tro lân lu tung lâplu, pro 9 ngế hlâ. Khu kăn pơkuâ mâu kong pơlê mơhnhôk mâu khu lêng kum kuăn pơlê rĕng ‘mâi mơnhông kế tơmeăm, troăng prôk. A tơring kong ngo Nam Trà My, kong pơlê Quảng Nam, kong mêi kân hnối mê ton hâi tung pơla hdrối kố nah hlo ai hên tíu tơhnah tơhnâp ki kân ƀă kŭn. Khu pơkuâ kong pơlê rơtế ƀă kuăn pơlê tơkŭm ‘mâi mơnhông pơtân vâ kuăn pơlê ƀă mâu rơxế chiâng prôk lăm.

Kong mêi têa kân a kong pơlê Bình Định pro 3 ngế tro klâk têa xua têa mơhiu. Nôkố, kơvâ ngăn troăng prôk kong pơlê kố dế mơhnhôk mâu tíu pêi cheăng rak vế, ‘mâi rơnêu troăng prôk vâ ‘mâi rơnêu tíu ki tơ’nhiê a mâu troăng prôk. Kong mêi a kong pơlê Phú Yên hiăng pro 6 ngế hlâ. Kong mê kân mâu hngêi kơmăi on tơhrik mơ’no têa pro lối 28 rơpâu rơpŏng kuăn pơlê a mâu tơring Tuy An, Phú Hòa, Đồng Xuân ƀă pơlê kong kơdrâm Tuy Hòa tro têa lu ó.

Katarina Nga tơplôu ƀă tơbleăng