Sap apoăng hơnăm troh nôkố, a Dak Lak hiăng châ hlo 3 tíu pơreăng châi klêa chu châu Phi a tơring Čư̆ Mgar ƀă pơlê kong kơdrâm Ƀuôn Ma Thuột, pro 56 to chu tro tâ pơreăng hlâ ƀă pơklât thế kơđu prâu tah. Pakĭng mê, 7 pơreăng kôk a kuăn kiâ kong hiăng ai a 4 tơring ƀă pơlê kong kơdrâm Ƀuôn Ma Thuột. Tíu xiâm mơdât pơreăng kong pơlê Dak Lak xuân tơbleăng tối 2 ngế ki hlâ xua tro tâ pơreăng rơxok.

Drêng ai tơdroăng pơreăng xông tâ tú, Vi ƀan kong pơlê Dak Lak pơkâ mâu tơring, khu, kơvâ cheăng thâ pêi pro mâu troăng hbrâ, mơdât pơreăng a kơpôu ro chu, í, peâp. Ki xiâm cho xôh pơkeăng mơdât pơreăng, ôh tá ăm pơreăng xông tâ tú ƀă chiâng tíu pơreăng tâ tú ki nếo; rĕng teăm prâu tah tơdrêng  kuăn kiâ kong ki tro tâ pơreăng, tŏng gum mơngế ki păn mơnăn tro lŭp; pơxâu phâk mâu ngế ki rôe tê, pơto kuăn kiâ kong ôh tá tro luât; tơdrêng amê pêi pro rơdêi tơdroăng pâk pơkeăng vaccine ăm mơnăn păn, mơ-eăm châ kơlo têk chu ki vâ iâ 80% tâi tâng khu kuăn kiâ kong.