VOV4.Sêdang - Pơtối mâu tơdroăng cheăng a Mih, pôa Nguyễn Xuân Phúc, Kăn xiâm hnê ngăn tơnêi têa hiăng lăm pôu ngăn Kŏng ti Pfizer, môi tung mâu kŏng ti pro pơkeăng rơkê má môi tung lâp plâi tơnêi. Kăn xiâm hnê ngăn tơnêi têa khĕn kơdeăn khât kŏng ti Pfizer hiăng pơcháu ăm Việt Nam ăm lối 2,8 rơtuh klŏng vaccine tiô kĭ tơhrâ ăm ki hiăng kĭ ƀă Chin phuh Việt Nam, tối nhên tơdroăng rak tơniăn xiâm vaccine ai tŭm ôh tá xê to ai pơxúa tơdroăng hlâ rêh ƀă ivá kuăn pơlê, mê ối kum pro tơniăn ƀă mơnhông tơ-ƀrê cheăng kâ - rêh ối pơlê pơla.

Kăn xiâm hnê ngăn thế Pfizer tơmâng khât ƀă hnan thế mơdêk kơxô̆ vaccine Pfizer ăm Việt Nam rĕng má môi tung khế 9/2021 ƀă pơcháu tâi ăm tung hơnăm 2021 tiô tơdroăng tơhrâ 31 rơtuh klŏng vaccine ki péa pâ hiăng kĭ; rĕng mơhno troăng ki vâ pơcháu rĕng má môi vaccine pâk ăm vâi hdrêng sap 12 troh 18 hơnăm.

Pfizer tơhrâ kô ăm Việt Nam tung hơnăm kố tŭm 31 rơtuh klŏng vaccine mơdât COVID-19 pâk ăm mâu hơnăm hiăng hên hlối ai 20 rơtuh klŏng vaccine pâk ăm vâi hdrêng drêng Pfizer ai tŭm tơdroăng chêh ‘măn ‘na ki tơƀrê ƀă ‘nâi hiăng tơniăn dêi vaccine mê.

Gương tơplôu ƀă tơbleăng