VOV4.Xơ Đăng - Kơxo lơ 14/12, Rôh hôp tiah hmâ Rôh hôp Kuô̆k hô̆i Á - Thái Bình Dương rôh má 29 (APPF-29) xua Kuô̆k hô̆i Hàn Quốc pơkuâ po tiô tơdroăng ki ‘no tơdrêng ing troăng hyôh Internet hiăng pơxiâm po kân krip. Veăng hôp a rôh hôp ai dâng 150 ngế kăn lo ing mâu Kuô̆k hô̆i ki tơrŭm cheăng APPF, ngế ki cheăng séa ngăn ƀă mâu ngế ki châ krếo thế. Khu kăn Kuô̆k hô̆i Việt Nam xua pôa Vương Đình Huệ, kăn xiâm hnê ngăn Kuô̆k hô̆i pro kăn xiâm pơkuâ djâ khu kăn veăng hôp a rôh hôp.

Tơpui hâk mơnê Rôh hôp, pôa Moon Jae-in, kăn xiâm pơkuâ kong têa Hàn Quốc tối nhên, mâu Kuô̆k hô̆i cho mâu ngế ki kal, teăng mâ ăm rơkong tơpui dêi kuăn pơlê, mơdêk mâu troăng hơlâ vâ pơkâ mơ’no mâu tơnêi têa vêh tiah hmâ. Pôa Moon Jae-in krếo thế, mâu kuô̆k hô̆i APPF mơhno tối nhên hnoăng cheăng pơkuâ tung tơdroăng ki hbrâ ăm môi chal ki nếo; tơdrêng a mê hnối tối tơngah, rôh hôp APPF-29 kô ƀlêi trâng tơniăn lĕm, veăng kum ‘mâi mơnhông tơrŭm cheăng Kuô̆k hô̆i ki hên tơdroăng rơtế tơrŭm, ‘mâi mơnhông klêi kơ’nâi ai pơreăng kân xuân môi tơdroăng tung la ngiâ tơniăn lĕm tâ, tối nhên ivá rêh dêi tơpui kâ hên kơvâ tung pơla dế nôkố.

Katarina Nga tơplôu ƀă tơbleăng