VOV4.Sêdang - A tíu pêi cheăng kăn xiâm tơpui kâ, pôa Bùi Thanh Sơn, ngế xiâm tơpui kâ tơnêi têa hiăng tơpui phôn ƀă kăn pơkuâ Kơpong ki pơkuâ xêh hdroâng kuăn ngo Choang Quảng Tây (Sinuâ) cho pôa Lộc Tâm Xã. A rôh tơpui phôn, pôa Bùi Thanh Sơn tối nhên, Đảng, Tơnêi têa ƀă kuăn pơlê Việt Nam hdrối ƀă kơ’nâi xuân môi tiah môi ngăn nhuô̆m tơrŭm cheăng ƀă kong têa ki a chê, tơrŭm cheăng tung la ngiâ tung tâi tâng pơla Việt Nam – Sinuâ, tung mê, đi đo môi tuăn ƀă Khu xiâm, kơvâ cheăng, kong pơlê Việt Nam mơdêk tơrŭm tơroâ ƀă Quảng Tây.

‘Na tơrŭm cheăng tung la ngiâ, pôa Bùi Thanh Sơn pơkâ thế péa pâ rak vế tơpui tơno, trâm mâ a rêm râ tiô tơdroăng ki hbrâ rak vế, mơdêk tối tơbleăng tơdroăng kal, troăng hơlâ ki ai tơdjâk troh hnoăng cheăng hbrâ mơdât pơreăng, tơrŭm hbrâ mơdât pơreăng a kơpong tơkăng kong; xúa mâu troăng hơlâ ki tơƀrê vâ rak vế ivá ki rơdêi tung tơrŭm cheăng kâ, tê mơdró, pro tơ’lêi hlâu ăm kế tơmeăm Việt Nam châ mot tung kong têa Sinuâ.

Katarina Nga tơplôu ƀă tơbleăng