VOV4.Sêdang - Klăng roh leh tơbâ 40 hơnăm Hâi mơjiâng Khu khôp Phop Việt Nam lơ 7/11, kơxo lơ 5/11, a Hà Nội, teăng mâ khu râ kăn pơkuâ Đảng, Tơnêi têa, Măt trâ̆n tơnêi têa Việt Nam, pôa Đỗ Văn Chiến, Kăn pơkuâ hnê ngăn cheăng Đảng, Kăn hnê ngăn Vi ƀan xiâm Măt trâ̆n tơnêi têa Việt Nam rơtế khu kăn pêi cheăng troh lăm pôu ƀă rơkâu Khu khôp Phop Việt Nam. Pôa Đỗ Văn Chiến mơnhên, lối 40 hơnăm hiăng hluâ Khu khôp Phop Việt Nam mơhnhôk mâu jâ, ƀok Phop, kuăn khôp phop tung lâp tơnêi têa tơkŭm mơnhông mơdêk cheăng kâ – rêh ối pơlê pơla, rak ngăn tơdroăng rêh ối pơlê pơla, rak ngăn mâu ngế ki ai tơdroăng rêh ối pá puât, mâu ngế ki ôh tá ai ivá vâ mơnhông tơtêk, mâu ngế trâm xía vâ, pơreăng tung lâp tơnêi têa.

Pôa Đỗ Văn Chiến, Kăn xiâm hnê ngăn Vi ƀan Măt trâ̆n Tơnêi têa Việt Nam lăm pôu, rơkâu khu khôp Phop Việt Nam

Mơnê tơdroăng pâ nhuô̆m, tơdroăng tơmâng dêi khu râ kăn pơkuâ Đảng, Tơnêi têa, Măt trâ̆n tơnêi têa Việt Nam ƀă mâu tơdroăng pêi cheăng dêi Khu pơkuâ tơdroăng khôp Phop tung pơla kố nah, Ƀok phop Thích Thanh Nhiễu – kăn phŏ hnê ngăn Khu pơkuâ tơdroăng khôp phop Tơnêi têa Khu khôp Phop Việt Nam mơnhên tung la ngiâ, Khu khôp Phop Việt Nam pơtối pơtâng tối, mơhnhôk mâu jâ, ƀok Phop, kuăn khôp phop ‘’Rêh ối lĕm ‘na châ, ‘na mơhúa’’, pêi kơtăng mâu troăng pơkâ pêi, troăng hơlâ dêi Đảng, troăng hơlâ, luât dêi Tơnêi têa, thăm veăng tơdroăng tŏng kum mơngế pá puât, kum mâu ngế kơtiê, kuăn pơlê tung pơlê kong kân dế tro tơdjâk xua pơreăng COVID-19.

A Sa Ly tơplôu ƀă tơbleăng