VOV4.Xơ Đăng - Kơxo lơ 6/12, a tíu pêi cheăng Chin phuh, pôa Lê Minh Khái, kăn pơkuâ ngăn tíu xiâm Đảng, Ngế pro xiâm phŏ hnê ngăn tơnêi têa hiăng ai rôh pêi cheăng ƀă pôa Choi Joo-ho, kăn xiâm pơkuâ tôh tơrŭm Samsung Việt Nam.

Pôa Lê Minh Khái, Ngế pro xiâm phŏ hnê ngăn tơnêi têa tơdah kăn pơkuâ tôh tơrŭm Sungsung Việt Nam

Tối nhên tơrŭm cheăng tơniăn lĕm nôkố pơla péa tơnêi têa Việt Nam – Hàn Quốc, malối cho tung mâu kơvâ cheăng, môi tiah: cheăng kâ, tê mơdró pơla péa pâ, pêi cheăng Việt Nam, ODA, tung tơdroăng ki tơdjuôm mê, ai ivá veăng kum dêi mâu khu mơdró kâ péa tơnêi têa, malối cho Samsung – ngế ki ‘no liăn cheăng tơdrêng kong têa ê kân má môi a Việt Nam, pôa Lê Minh Khái mơnhên tối khât klêi kơ’nâi pêi cheăng mơjiâng pro, tê mơdró tơƀrê dêi Samsung a Việt Nam, malối cho tung pơla xơpá xua pơreăng kân COVID-19 pro, mâu tơdroăng cheăng mơjiâng pro, tê mơdró dêi Samsung tung mâu kơvâ cheăng pơrá mơdêk tâng vâ pơchông ƀă khế kố hơnăm nah.

Kăn xiâm pơkuâ Samsung Việt Nam Choi Joo-ho ăm ‘nâi, troh nôkố, grup pơkuâ hiăng ‘no liăn a Việt Nam tâi tâng ai 17,74 rơtal dollars, kơxô̆ liăn ‘no châ 100% tung tâi tâng kơxô̆ liăn hiăng chêh inâi.

Katarina Nga tơplôu ƀă tơbleăng