VOV4.Sêdang - Pơkuâ roh hôp thâ mơ’no tơdrêng tung um tiô troăng măng Internet hbrâ ví xía vâ kong mêi khía mơhot má 6 tơkŭm po kơxê lơ 23/9 a Hà Nội, pôa Lê Văn Thành, Ngế pro xiâm phŏ hnê ngăn tơnêi têa – Kăn pơkuâ Khu hnê mơhno Tơnêi têa ‘na hbrâ ví kong prâi pro ôh tá tơniăn – Kăn xiâm hnê ngăn Vi ƀan Tơnêi têa Hbrâ ví tơdroăng ki ôh tá tơniăn ‘na kong prâi ƀă ti tăng mơngế hliăng tiâ pơkâ, mâu kong pơlê ôh tá chiâng tơngôu tung hbrâ ví, thế tơniăn châ chăn kuăn pơlê ki má lối tung pơla pơreăng kân COVID-19 xông tâ tú ó nôkố.

Tơbleăng rĕng dêi Khu hnê mơhno Tơnêi têa ‘na hbrâ vi kong prâi pro ôh tá tơniăn ăm hlo, nôkố kal 21 toăng tuk, plong dêi mâu kong pơlê môi tiah: Đà Nẵng, Bình Định, Quảng Ngãi tung kơpong ki rơ-iô, khu mô đô̆i gak kring têa kơxĭ hiăng rơtế rơpŏng mâu khu pơkuâ tuk đi đo krếo mâu tuk, plong lăm a tíu tơniăn.

Pôa Lê Văn Thành pơkâ mâu kong pơlê môi tiah Đà Nẵng, Quảng Nam thâ hnê mơhno mâu plong, tuk lo ing kơpong ki rơ-iô dêi khía mơhot. Tơdrêng amê mơ-eăm tơtrŏng tơniăn kuăn pơlê a mâu kơpong tơ’lêi kong mêi khía mơhot, têa rơlêa plong mot, tơnêi tơhnah tơhnâp xuân môi tiah hbrâ pêi pro troăng xĕn kuăn pơlê tơniăn ‘na kuăn mơngế ƀă tơmeăm khoăng, tơdrêng amê tơniăn hbrâ mơdât pơreăng COVID-19.

A Sa Ly tơplôu ƀă tơbleăng