VOV4.Sêdang - Pôa Lê Văn Thành, Ngế pro xiâm phŏ hnê ngăn tơnêi têa pơkuâ hneăng hôp mơ’no tơdrêng tung um tiô troăng hyôh internet “kơdroh tah xơpá, tơvâ tơvân ăm mâu khu mơdró ki mơjiâng pro tơmeăm a mâu kơpong hngêi kơmăi kơmok, kơpong cheăng kâ, kơpong pro tơmeăm, kơpong hngêi kơmăi ki dâi lĕm nếo ƀă kopong hngêi hngêi kơmăi”, hôp a hâi lơ 20/9 a Hà Nội.

Tiô Khu xiâm Pơkâ ƀă ‘no liăn cheăng, pơreăng COVID-19 tâ tú rơ-iô, hlối ton, hiăng pro lŭp hên ăm khu mơdró, ăm kuăn pơlê. Hên mâu khu mơdró thế pơtê pro mâu tơmeăm khoăng ‘na mung hdrối tơmeăm mơjiâng pro, tơdroăng pêi pro, ‘na mơngế pêi cheăng, hên khu mơdró thế tah lôi mâu hlá đơn hiăng chêh hdrối vâ rôe mâu tơmeăm, pơxiâm hlo ai tơdroăng chĕn ôh tá kâi tơvêh, tơdjâk troh tơdroăng rêh ối dêi lối rơtuh ngế ki pêi cheăng tung mâu kơpong hngêi kơmăi, kơpong cheăng kâ, kơpong mơjiâng tơmeăm ƀă hên ki ê.

Vâ kơdroh tah xơpá, ‘mâi mơnhông pêi pro tê mơdró mâu khu mơdró pâ thế Chin phuh séa ngăn pơkâ mâu troăng rơhlâ, tuá tơkŭm pêi pro vâ khu mơdró châ rah xo tơtro ƀă tơdroăng cheăng tiô ivá tơná; ăm phêp khu mơdró hbrâ tơbleăng mâu troăng rơhlâ tơkŭm pêi pro tê mơdró tơtro ƀă ivá dêi khu mơdró. Pakĭng mê, pâ thế mâu kong pơlê, pơlê kong kân ôh tá chiâng hmôu pơ xuá mâu pơkâ mơdât pơreăng, ah pro chiâng pá ăm khu mơdró ki dế chơ chiân tơmeăm tê mơdró ƀă mơngế cheăng vêh pêi cheăng nếo.

Gương tơplôu ƀă tơbleăng