VOV4.Xơ Đăng - Klăng roh Tơdroăng ‘’Pôu pơ-eăng tơdroăng ki mơ-eăm Việt’’ hơnăm 2021, kơxo lơ 13/12, pôa Nguyễn Khắc Định, Kăn xiâm phŏ hnê ngăn Kuô̆k hô̆i hiăng ai roh trâm mâ 20 ngế kăn teăng mâ, tung kơxô̆ 50 ngế ki djâ troăng ahdrối droh rơtăm chó chêng tơvê kŏng ki má môi, ối tung 34 kong pơlê, pơlê kong kơdrâm veăng tơdroăng. Tơdroăng ‘’Pôu pơ-eăng tơdroăng ki mơ-eăm Việt’’  hơnăm 2021 vâ pro ăm troh lâp lu mâu ngế ki djâ troăng ahdrối rêh ối pôu râng hnoăng cheăng, mơ-eăm tung pơlê pơla.

50 um méa droh rơtăm ki chó chêng tơvê kŏng kơhnâ má môi hơnăm kố ai hên ngế châ tơƀrê tung mâu tơdroăng mơhno túa lĕm tro ngê̆ thuât, tơ’noăng ivá ƀă pro ăm vâi hdrêng tiô ƀối ó rơdêi; ôh tá xê to kơhnâ veăng tung tơdroăng pơxiâm tăng cheăng pêi, pơxiâm tăng cheăng pêi châ tơƀrê, mê ối thăm kum mâu pú hmâ tơdroăng rêh ối môi tiah pơxiâm tăng cheăng pêi, thăm veăng tơdroăng tŏng kum pơlê pơla cho um méa ki eăng tung pơlê pơla, ki rơhêng vâ tối cho veăng tung tơdroăng pơtâng tối, tŏng kum hbrâ mơdât pơreăng COVID-19 pơla kố nah.

Pôa Nguyễn Khắc Định tối ăm ‘nâi rơtế mâu kơ koan dêi Kuô̆k hô̆i pơtối pêi kêi đeăng ƀă tơkŭm po pêi pro châ tơƀrê mâu troăng hơlâ ai tơdjâk troh mơngế chó chêng tơvê kŏng.

A Sa Ly tơplôu ƀă tơbleăng