VOV4.Sêdang - Kơxo lơ 7/12 a Tíu xiâm Đảng, pôa Nguyễn Phú Trọng, Kăn xiâm pơkuâ hnê ngăn Đảng hiăng tơdah pôa Xaysomphone Phomvihane ƀă khu râ kăn xiâm Kuô̆k hô̆i kong têa Lếo. Kăn xiâm hnê ngăn Kuô̆k hô̆i kong têa Lếo tơbleăng ƀă pôa Nguyễn Phú Trọng, Kăn xiâm pơkuâ hnê ngăn Đảng tơnêi têa pin ‘na tơdroăng kong têa Lếo achê kố, ki má lối cho tơdroăng po rơdâ pêi pro Pơkâ Hneăng hôp má XI dêi Đảng; ‘na tơdroăng Roh hneăng hôp tơpui tơno ƀă pôa Vương Đình Huệ, Kăn xiâm hnê ngăn Kuô̆k hô̆i ƀă Hneăng hôp tơpui tơno túa ki rơkê tơtro pơla péa Kuô̆k hô̆i.

Pôa Xaysomphone Phomvihane mơnhên, Kuô̆k hô̆i kong têa Lếo kô tơrŭm krá tơniăn ƀă Kuô̆k hô̆i Việt Nam pêi pro châ tơƀrê mâu tơdroăng môi tuăn pơla Kăn xiâm pơkuâ péa Đảng, péa tơnêi têa ƀă Môi tuăn tơrŭm cheăng pơla péa Kuô̆k hô̆i. Pôa Nguyễn Phú Trọng mơnhên Việt Nam môi tuăn ó rơdêi ƀă tŭm têk tơdroăng pơhlêh nếo dêi Lếo ƀă loi tơngah ƀă khôi túa mơnhông mơdêk pơhlêh nếo, ing pơkuâ dêi Đảng Nhân dân kăch măng Lếo, tơdroăng pơkuâ dêi Chin phuh, tơdroăng séa ngăn dêi Kuô̆k hô̆i, kuăn pơlê Lếo pơtối châ tơƀrê nếo, kân kĭn tâ tung tơdroăng pơ’lêh nếo, pêi pro ƀlêi trâng Pơkâ Hneăng hôp má XI dêi Đảng.

A Sa Ly tơplôu ƀă tơbleăng