VOV4.Sêdang - Kơxê lơ 29/10, a Tíu pêi cheăng xiâm Đảng, pôa Nguyễn Phú Trọng, Kăn xiâm hnê ngăn Đảng hiăng tơdah Kăn teăng mâ kong têa Kŏng hoa Cuba troh koh hmât klăng leh tơbâ 55 hơnăm, roh trâm mâ pơla Pôa Hồ Chí Minh, Kăn xiâm hnê ngăn tơnêi têa hneăng apoăng ƀă pôa Raul Castro, Kăn pơkuâ Kăch măng Cuba, lơ 29/10/1966 – 29/10/2021 ƀă Kăn teăng mâ pơxiâm hneăng pêi cheăng a Việt Nam.

Klăng roh kố, pôa Nguyễn Phú Trọng vêh mơnhên tơdroăng rŭm môi tuăn hdrối môi tiah kơ’nâi, tơrŭm cheăng nhŏng o, kăn pơkuâ cheăng dêi Đảng, Tơnêi têa ƀă kuăn pơlê Việt Nam ƀă Đảng, Tơnêi têa ƀă kuăn pơlê Cuba; Việt Nam pơtối rơtế ƀă Cuba tung tơdroăng cheăng kâ – rêh ối pơlê pơla chuh nghiah. Pôa Nguyễn Phú Trọng mơnê Đảng, Tơnêi têa ƀă kuăn pơlê Cuba nhŏng o, tơdroăng tuăn pâ dêi pôa Raul Castro, Kăn pơkuâ ƀă mâu kăn pơkuâ xiâm kong têa Cuba, mơhé ối trâm hên pá puât laga xuân hbrâ tŏng kum Việt Nam, ki rơhêng vâ tối cho tơrŭm ‘na vaccine COVID-19.

A Sa Ly tơplôu ƀă tơbleăng