VOV4.Sêdang - Kơxo lơ 24/9, a tíu pêi cheăng xiâm Đảng, pôa Nguyễn Phú Trọng, Kăn xiâm pơkuâ hnê ngăn Đảng ai roh tơpui phôn ƀă pôa Tập Cận Bình, Kăn xiâm pơkuâ hnê ngăn Đảng, Kăn xiâm hnê ngăn kong têa Sinuâ. Pôa Nguyễn Phú Trọng rơkâu 72 hơnăm Mơjiâng kong têa Sinuâ, tối nhên, mơhé pơreăng COVID-19 tơdjâk ó troh tŭm tơdroăng rêh ối lâp plâi tơnêi ƀă trâm mâ tơpui tơno, tơrŭm cheăng pơla péa tơnêi têa, tơrŭm cheăng péa Đảng, péa tơnêi têa Việt Nam – Sinuâ pơtối rak mơnhông mơdêk; mơhno tơdroăng mơnê kong têa Sinuâ hiăng hnê ăm túa ki rơkê tơtro, tŏng kum vaccine ăm Việt Nam tung tơdroăng hbrâ, mơdât pơreăng COVID-19 ƀă pói vâ péa pâ pơtối kơjo ăm tơdroăng pêi pro tơrŭm cheăng hbrâ mơdât COVID-19 ƀă xông têk, mơnhông mơdêk klêi kơ’nâi pơreăng kân COVID-19.

Pôa Nguyễn Phú Trọng, Kăn xiâm pơkuâ hnê ngăn Đảng xuân pơkâ thế, péa pâ pơtối tơrŭm krá tơniăn ‘na pơkuâ, gâk kring tơkăng kong, mơjiâng troăng tơkăng kong hơniâp lĕm, tơniăn, tơrŭm ƀă mơnhông mơdêk.

A Sa Ly tơplôu ƀă tơbleăng