VOV4.Xơ Đăng - Pêi pro tiô Tơdroăng trâm mâ kuăn pơlê klêi kơ’nâi hneăng hôp má 2 Kuô̆k hô̆i hneăng má 15, kơxo lơ 26/11, pôa Nguyễn Phú Trọng, Kăn xiâm pơkuâ hnê ngăn Đảng rơtế mâu kăn teăng mâ Kuô̆k hô̆i ối tung Tíu tâ phĭu kơxô̆ 1, Khu râ kăn teăng mâ Kuô̆k hô̆i Pơlê kong kân Hà Nội hiăng ai roh trâm mâ kuăn pơlê mâu pơlê kân Ba Đình, Đống Đa ƀă Hai Bà Trưng tiô troăng mơ’no tơdrêng tung um tiô troăng măng Internet hlối mơ’no tơdrêng tung um tơvi troh 56 bêng dêi 3 pơlê krâm ƀă 1.225 ngế kuăn pơlê, vâ tơbleăng tơdroăng hneăng hôp má 2 ƀă tiâ rơkong tơpui tối dêi kuăn pơlê.

Ki hên kuăn pơlê mơnhên hneăng hôp má 2 Kuô̆k hô̆i hneăng má 15 tơkŭm po tung tơdroăng ki má môi păng ‘nâng, mâu kăn teăng mâ Kuô̆k hô̆i pêi cheăng ƀă hiâm mơno pôu râng hnoăng cheăng ƀă châ môi tuăn. Ki má lối cho ‘na mâu tơdroăng pơ’lêh nếo, pơ’lêh tung tơdroăng pêi cheăng dêi Kuô̆k hô̆i. Ƀă tơdroăng hbrâ, mơdât pơreăng COVID-19, kuăn pơlê pơkâ thế Kuô̆k hô̆i, Chin phuh, mâu khu cheăng, khu xiâm, kơvâ cheăng thăm mơ’no liăn cheăng ăm hngêi pơkeăng, tơdroăng khăm pơlât hbrâ; mơjiâng ƀă môi tuăn ‘na kŏng ngê̆ xúa tơdjuôm lâp tơnêi têa tung hbrâ, mơdât pơreăng COVID-19.

Tiô pôa Nguyễn Phú Trọng, Kăn xiâm pơkuâ hnê ngăn Đảng, vâ mâu Pơkâ dêi Kuô̆k hô̆i pêi pro tung tơdroăng rêh ối, mâu kơ koan tung Khu râ kăn pơkuâ Tơnêi têa thâ tơkŭm po pêi pro tơtro mâu luât, pơkâ nếo châ tơbleăng ăm pêi pro; pơtối pơ’lêh nếo, mơdêk tơdroăng pêi cheăng hôm păng ‘nâng, tơtrŏng tơdroăng séa ngăn, mơnhên vâ mơnhông mơdêk mâu tơdroăng ki hôm ƀă tah lôi mâu tơdroăng ki ối tơvâ tơvân, tá hâi tơtro.

A Sa Ly tơplôu ƀă tơbleăng