VOV4.Sêdang - Pêi pro tơdroăng trâm mâ kuăn pơlê hdrối Hneăng hôp má 3, Kuô̆k hô̆i hneăng má 15, pôa Nguyễn Phú Trọng, Kăn xiâm pơkuâ hnê ngăn Đảng hiăng trâm mâ kuăn pơlê mâu pơlê kân Ba Đình, Đống Đa, Hai bà Trưng, Hà Nội vâ tơbleăng tơdroăng hneăng hôp tơmâng ƀă tiâ mâu rơkong pâ thế dêi kuăn pơlê. Ki hên kuăn pơlê tối phiu ro ‘na tơdroăng châ tơƀrê, tơdroăng ki kal a Hneăng hôp Tơnêi têa 4 nếo mơgêi, mơhno tơdroăng môi tuăn ƀă troăng hơlâ dêi Đảng, Tơnêi têa ‘na tơdroăng rah xo kăn ƀô̆ pêi cheăng ton xŏn châ tối tung roh xông tơpui mơgêi Hneăng hôp dêi pôa Nguyễn Phú Trọng.

Pôa Nguyễn Phú Trọng, Kăn xiâm pơkuâ hnê ngăn Đảng

Xông tơpui a roh trâm mâ kuăn pơlê, pôa Nguyễn Phú Trọng tối, pơreăng kân COVID-19 tơdjâk kân troh lâp plâi tơnêi tối tơdjuôm, tung mê ai tơnêi têa pin. Troh nôkố, tŭm tơdroăng pêi cheăng dêi Tơnêi têa xuân tơkŭm po tiah mê tung tơdroăng hbrâ, mơdât pơreăng. Pôa Nguyễn Phú Trọng pói vâ tung la ngiâ, tá khu cheăng kal kí ƀă kuăn pơlê pơtối mơnhông hiâm mơno rŭm môi tuăn, môi tuăn mơ-eăm, khŏm mơ-eăm hên vâ tơkâ hluâ pá puât, ôh tá chiâng tơngôu, ôh tá vâ mơ-eăm mơdât pơreăng COVID-19.

Pôa Nguyễn Phú Trọng pơkâ, rêm ngế kăn teăng mâ Kuô̆k hô̆i kal khât cho kăn teăng mâ môi tuăn, tá hiâm mơno, đi đo mơ-eăm pêi pro tơtro hnoăng cheăng châ pơcháu.

A Sa Ly tơplôu ƀă tơbleăng