VOV4.Sêdang - Kơxo lơ 30/9, tơdroăng tơkêa bro kông Thủ Thiêm 2 hiăng tơdjêp, tơdjêp kông troh péa pâ peăng pơlê kong kơdrâm Thủ Đức ƀă pơlê kân 1, Pơlê kong kân Hồ Chí Minh. Veăng leh ai pôa Nguyễn Văn Nên, Kăn cheăng tung Khu xiâm kal kí, Kăn pơkuâ hnê ngăn cheăng Đảng Pơlê kong kân Hồ Chí Minh; pôa Phan Văn Mãi, Kăn hnê ngăn Vi ƀan pơlê kong kân ƀă kăn teăng mâ mâu khu, kơvâ cheăng.

Kông Thủ Thiêm kô tơdjêp pơlê kong kân Thủ Đức ƀă Pơlê krâm 1

Khu pơkuâ mơ’no liăn mơjiâng pro kông cho Kŏng ti tơlo liăn cheăng mơjiâng pro hngêi trăng, troăng klông Đại Quang Minh, tâi tâng kơlo liăn mơ’no cho 4.260 rơtal liăn, kơxô̆ liăn mơ’no cheăng tiô troăng khu tơrŭm cheăng tơnêi têa ƀă ngế krê dó inâi PPP. Tơdroăng tơkêa bro kông Thủ Thiêm 2 xŏn lối 1,4 km, tung mê kông xŏn 886 met ƀă 6 troăng rơxế kơtâu.

Kông ai pro kơxái kân xŏn 113 met. Tơdroăng tơkêa bro kông Thủ Thiêm 2 cho tơmeăm ki xiâm ối tung pơkâ péa xôh rế hbrâ mơdât pơreăng rế mơnhông cheăng kâ – rêh ối pơlê pơla dêi pơlê kong kân. Kố cho môi tung kơxô̆ iâ tơdroăng tơkêa bro châ Vi ƀan pơlê kong kơdrâm ăm phêp mơjiâng pro tung pơla pêi pro klâ kơtăn pơlê pơla.

A Sa Ly tơplôu ƀă tơbleăng