VOV4.Sêdang - Tung rôh veăng hôp Hô̆i đong Khu lâp kong têa hneăng 76, hâi lơ 21/9, pôa Nguyễn Xuân Phúc, Kăn xiâm hnê ngăn tơnêi têa hiăng ai péa rôh tơpui tơno tơdroăng kal ƀă pôa Abdulla Shahid,  Kăn xiâm hnê ngăn Hô̆i đong, ƀă pôa António Guterres, kăn xiâm chêh tôm xo rơkong dêi Khu lâp kong têa. A mâu rôh hôp tơpui tơno, pôa Nguyễn Xuân Phúc tối Việt Nam ngăn nhoăm ƀă vâ môi tuăn hnoăng cheăng xiâm dêi khu lâp kong têa tung tơdroăng pơkuâ cheăng lâp plâi tơnêi vâ hbrâ ví mâu tơdroăng pơloăng mơnúa ki kân nôkố ƀă púi vâ mơdêk tơrŭm cheăng tung tŭm tơdroăng ƀă Khu lâp kong têa.

Kăn xiâm hnê ngăn tơnêi têa ăm ‘nâi Việt Nam dế tơkŭm ivá tung tơdroăng plâ mơdât COVID-19 dế tâ tú rơ iô, pơkâ tơniăn, ivá dêi kuăn mơngế kuăn pơlê cho kơpêng, hlối mơnê tơdroăng COVAX ƀă mâu khu tơrŭm cheăng Khu lâp kong têa hiăng veăng kum ăm vaccine, hbrâ tơmeăm xúa tung khăm pơlât ƀă hnê ‘na luât pơkâ hbrâ mơdât pơreăng ƀă pơlât ăm mo lĕm ivá klêi pơlât prêi pơreăng, pâ thế khu lâp kong têa pơtối veăng kum Việt Nam tung la ngiâ, malối vâ veăng kum tơbleăng pâk vaccine tro lâp lu ăm kuăn pơlê.

Katarina Nga tơplôu ƀă tơbleăng