VOV4.Xơ Đăng - Tiô rơkong krếo thế dêi pôa Vladimir Putin, Kăn xiâm pơkuâ kong têa Rusi, pôa Nguyễn Xuân Phúc, Kăn xiâm hnê ngăn tơnêi têa pơkuâ xiâm khu râ kăn xiâm Việt Nam lăm pôu pêi cheăng a kong têa Rusi sap hâi lơ 29/11 troh hâi lơ 2/12/2021. Kố cho roh lăm pôu ki kal mơnhên 71 hơnăm Việt Nam ƀă kong têa Rusi mơjiâng tơrŭm tơpui kâ, 20 hơnăm péa tơnêi têa kĭ tơbleăng tơdjuôm ‘na tơrŭm cheăng ton xŏn ƀă vâ chê 10 hơnăm tơbleăng tơdjuôm  ‘na thăm tơrŭm tâ mê nếo tung tơrŭm tŭm têk, ing mê po mâu troăng tơrŭm cheăng nếo pơla péa tơnêi têa.

Khế 5/2019, drêng pro Ngế pro xiâm hnê ngăn tơnêi têa, pôa Nguyễn Xuân Phúc lăm pôu pêi cheăng a kong têa Rusi ƀă ai roh trâm mâ ƀă pôa Vladimir Putin, kăn xiâm pơkuâ kong têa Rusi

Lăm pôu pêi cheăng kong têa Rusi roh kố dêi pôa Nguyễn Xuân Phúc ối châ pói tơngah tơrŭm cheăng Việt Nam – Rusi tung hbrâ, mơdât pơreăng COVID-19, ki má lối cho tơdroăng thăm pêi pro tơdroăng Rusi tŏng kum vaccine ƀă hnê xúa kơmăi kơmok mơjiâng pro vaccine ăm Việt Nam. Ing mê kum péa tơnêi têa mơdât pơreăng ƀă thăm tơrŭm pơla péa tơnêi têa rế prôk trâu hơngế ƀă châ tơƀrê.

A Sa Ly tơplôu ƀă tơbleăng