VOV4.Xơ Đăng - Kơmăng lơ 2/12 tiô chôu kong têa Rusi, pôa Nguyễn Xuân Phúc, Kăn xiâm hnê ngăn tơnêi têa ƀă kơdrâi pôa pơkuâ xiâm khu râ kăn xiâm Việt Nam hiăng lo ing kong têa Rusi vêh a tơnêi têa, mơgêi tơniăn roh lăm pôu pêi cheăng kong têa Rusi tiô rơkong krếo thế dêi pôa Vladimir Putin, Kăn xiâm pơkuâ kong têa Rusi. Ƀă dâng 30 tơdroăng pêi cheăng dêi Kăn xiâm hnê ngăn tơnêi têa ƀă hên tơdroăng pêi cheăng dêi mâu khu xiâm, kơvâ cheăng, roh lăm pôu dêi pôa Nguyễn Xuân Phúc hiăng djâ châ tơƀrê hên lĕm tro tung mâu kơvâ cheăng tơrŭm pơla péa tơnêi têa, thăm mơnhông ƀă pro trâu hơngế tâ tung tơrŭm cheăng ton xŏn tŭm têk pơla Việt Nam – Rusi.

Péa kăn xiâm pơkuâ môi tuăn tơrŭm cheăng kâ chiâng tơdroăng ki xiâm ki kal dêi tơrŭm cheăng Việt Nam – Rusi; môi tuăn pơtối pêi pro châ tơƀrê Pơkâ tê mơdró tơ’lêi hlâu pơla Việt Nam ƀă Khu tơrŭm cheăng kâ châu Á – Âu, xuân môi tiah pro tơ’lêi hlâu tâ mê nếo ăm tê mơdró ƀă mơ’no liăn cheăng pơla péa pâ, vâ mơnhông tơtêk ó rơdêi tung mâu kơvâ cheăng ki kal.

Roh lăm pôu pêi cheăng kong têa Rusi dêi pôa Nguyễn Xuân Phúc drêng kố mơdêk tơdroăng ki kal tơrŭm cheăng péa tơnêi têa mê mơhno nhên má môi cho tơbleăng tơdjuôm ‘na Troăng pêi ki kal tơrŭm cheăng ton xŏn tŭm têk pơla Việt Nam – Rusi troh hơnăm 2030.

A Sa Ly tơplôu ƀă tơbleăng