VOV4.Sêdang - Kơxê lơ 15/10, pôa Nguyễn Xuân Phúc, Kăn xiâm hnê ngăn tơnêi têa hiăng pêi cheăng ƀă Khu kăn tung Đảng Hngêi tơleăng xiâm kuăn pơlê. Xông tơpui a roh pêi cheăng, pôa Nguyễn Xuân Phúc, Kăn xiâm hnê ngăn tơnêi têa kheăn kơdeăn kơvâ hngêi tơleăng hiăng pêi pro tro tơdroăng cheăng, hnoăng cheăng tơleăng, pêi pro hnoăng luât, gak kring tơdroăng ki tro ‘ló, hnoăng kuăn mơngế, ki pơxúa tiô luât dêi kơ koan, khu tơrŭm cheăng, ngế krê.

Pôa Nguyễn Xuân Phúc, Kăn xiâm hnê ngăn tơnêi têa pêi cheăng ƀă Khu ối tung Đảng Hngêi tơleăng xiâm kuăn pơlê

Ki rơhêng vâ tối kơvâ hiăng ai hên troăng pêi tơtêk vâ mơdêk ki tơtro dêi tơdroăng pơkâ tơleăng dêi hngêi tơleăng; pơ’lêh nếo troăng tơleăng, tơkŭm po roh tơleăng tiô ‘mâi rơnêu luât, tơtro ƀă troăng pêi tơdjuôm dêi lâp plâi tơnêi. Ing mê, kum thăm loi tơngah dêi kuăn pơlê a luât tơdâng tơ’mô, kơtăng, tơniăn nhuô̆m luât. Kăn xiâm hnê ngăn tơnêi têa pơkâ thế kơvâ hngêi tơleăng kal hbrâ, thăm rĕng pêi pro, mơ’no tơleăng teăm tơdrêng, kơtăng mâu roh kâ kơhveăm liăn ngân, cheăng kâ ki râ ó, pá puât ƀă mâu roh tơdroăng xôi ki pơlê pơla rơhêng vâ ‘nâi plĕng tiô troăng “ôh tá ai kơpong mơdât, kơbố xuân môi tiah, ôh tá chiu tơdroăng tơdjâk ôh tá tro dêi mơngế krê ki lâi, khu tơrŭm ki lâi’’.

A Sa Ly tơplôu ƀă tơbleăng