VOV4.Sêdang - Pơtối mâu tơdroăng mơhnhôk mơ’no liăn tê mơdró, mơ’no liăn cheăng klăng roh veăng Roh tơpui tơno tơdjuôm khu râ kăn xiâm Grup kring vế Hneăng 76 dêi Khu lâp kong têa, hâi lơ 22/9, tiô chôu kong têa ki tơkŭm po mê, pôa Nguyễn Xuân Phúc hiăng ai mâu roh tơdah Khu tê mơdró Mih – ASEAN (USABC), Khu tơrŭm tê mơdró Mih, Ƀơrô tê mơdró kong têa Mih ƀă khu râ kăn pơkuâ mâu khu tê mơdró grup pơkuâ hên kong têa. Pôa Nguyễn Xuân Phúc kheăn kơdeăn hnoăng dêi mâu khu tơrŭm cheăng, khu tê mơdró Mih tung tơdroăng thăm mơnhông mâu khu tê mơdró Mih tê mơdró ƀă mơ’no liăn cheăng a Việt Nam tung hên hơnăm hiăng hluâ.

Tung la ngiâ, Kăn xiâm hnê ngăn tơnêi têa pơkâ thế mâu khu tơrŭm pơtối thăm mơnhông mâu khu tê mơdró Mih mơ’no liăn cheăng a Việt Nam, ki má lối cho tung mâu kơvâ pêi cheăng ton xŏn môi tiah kŏng nghê̆ rơxông nếo, hngêi trăng troăng klông, liăn ngân, ƀă hía hé; djâ Việt Nam tung tơdroăng tê ăm tơmeăm khoăng ki kal tung kơpong ƀă tung lâp plâi tơnêi. Rơtế amê cho mơhnhôk Chin phuh Mih pơtối tŏng kum vaccine hbrâ mơdât COVID-19 ƀă kơmăi kơmok, hnê kơmăi kơmok mơjiâng vaccine ăm Việt Nam.

A Sa Ly tơplôu ƀă tơbleăng