VOV4.Xơ Đăng - Xuân a kơxê lơ 21/12, tung rôh lăm pôu râ tơnêi têa troh a kong têa Kul, pôa Nguyễn Xuân Phúc, kăn xiâm hnê ngăn tơnêi têa pin hiăng ai rôh tơpui tơno ƀă pôa Heng Samrin, kăn xiâm hnê ngăn Kuô̆k hô̆i kong têa Kul. A rôh tơpui tơno, Péa ngế kăn xiâm pơkuâ tối nhên Việt Nam ƀă Kul cho péa tơnêi têa ki ối achê, tơrŭm, ai khôi hmâ tơrŭm, tŏng kum dêi rơpó, cho tơdroăng ki hâk tơngăm ƀă cho kế tơmeăm ki kơnía git dêi péa hdroâng kuăn ngo ki mâu rơxông xo ah hmôi dêi péa tơnêi têa kal pơtối rak vế ƀă mơnhông.

Pôa Nguyễn Xuân Phúc, kăn xiâm hnê ngăn tơnêi têa tơpui tơno ƀă kăn xiâm hnê ngăn Kuô̆k hô̆i Kul

Péa pâ môi tuăn tung la ngiâ kô rak vế trâm mâ, tơpui tơno đi đo tung mâu tơdroăng; mơdêk tối tơbleăng ăm dêi rơpó tơdroăng ki rơkê plĕng xuân môi tiah tơkŭm po mâu rôh trâm mâ pơla mâu kăn Kuô̆k hô̆i, Khu kăn Kuô̆k hô̆i tơrŭm tơroâ, khu kăn kơdrâi Kuô̆k hô̆i, Khu kăn Kuô̆k hô̆i hơnăm ối nếo péa tơnêi têa; pơtối mơdêk hnoăng cheăng dêi Kuô̆k hô̆i péa tơnêi têa a mâu rôh hôp Kuô̆k hô̆i pơla péa pâ; pơtối tơrŭm krá tơniăn, tŏng kum dêi rơpó a mâu rôh hôp Kuô̆k hô̆i tung kơpong ƀă a kong têa ê môi tiah AIPA, Khu tơrŭm Kuô̆k hô̆i kong têa ê, Rôh hôp Kuô̆k hô̆i châu Á – Thái Bình Dương.

Katarina Nga tơplôu ƀă tơbleăng