VOV4.Xơ Đăng - Hdrối mê, pôa Nguyễn Xuân Phúc, kăn xiâm hnê ngăn tơnêi têa hiăng tơpui tơno ƀă pôa Hun Sen, Ngế pro xiâm hnê ngăn kong têa Kul. A rôh rôh tơpui tơno, Péa ngế kăn xiâm pơkuâ hiăng môi tuăn khât ‘na mâu túa pơkâ ki kân cho mơdêk tơrŭm pơla péa tơnêi têa tung la ngiâ, tiah mê kô tơkŭm tối tơbleăng tơƀrê mâu tơdroăng tơkêa, tơpui tơno ki hiăng kĭ; rak vế đi đo mâu rôh lăm pôu, trâm mâ, pơtroh mâu khu râ kăn ƀă rêm râ, mâu tơdroăng pơkâ tơrŭm pơla péa pâ.

Pôa Nguyễn Xuân Phúc, kăn xiâm hnê ngăn tơnêi têa tơpui tơno ƀă pôa Hun Sen, Ngế pro xiâm hnê ngăn kong têa Kul

Péa ngế kăn xiâm pơkuâ xuân hiăng môi tuăn pơtối mơdêk tơrŭm cheăng tung mâu kơvâ cheăng hnê cheăng pêi, luât, pêi chiâk deăng - loăng pơlái - păn ká xi xŏng, kong kế ƀă kong prâi, ôm hyô; mơdêk tơpui tơno pêi pro troh tơdroăng ki mơnhên dêi rơpó ‘na tơdroăng ki hiăng pâk vaccine, Hlá mơ-éa mơnhên hiăng pâk vaccine COVID-19.

Pôa Nguyễn Xuân Phúc, kăn xiâm hnê ngăn tơnêi têa rơhêng vâ péa pâ pơtối tơrŭm, mơdêk hiâm mơno tung tơdroăng pơkâ dêi ASEAN ‘na Biển Đông, pơkâ tơleăng mâu tơdroăng tơxup tơbriât ƀă tơdroăng ki hơniâp lĕm, tung tơdroăng luât pơkâ dêi kong têa.

Katarina Nga tơplôu ƀă tơbleăng