VOV4.Xơ Đăng - Tung roh lăm pôu pêi cheăng a kong têa Rusi, kơxê lơ 30/11 a (Mas-kơ-va) Moskwa, pôa Nguyễn Xuân Phúc, Kăn xiâm hnê ngăn tơnêi têa hiăng ai roh tơpui tơno ƀă pôa Vladimir Putin, Kăn xiâm hnê ngăn kong têa Rusi. A roh hôp tơpui tơno, péa kăn xiâm kheăn kơdeăn tơrŭm cheăng lêng, gak kring péa tơnêi têa hiăng châ tơƀrê kal khât, pro trâu hơngế kal kí loi tơngah péa tơnêi têa ƀă mơnhên mơ-eăm djâ tơrŭm cheăng kâ chiâng tơdroăng ki kal khât tung tơrŭm cheăng Việt Nam – Rusi.

Pôa Nguyễn Xuân Phúc, Kăn xiâm hnê ngăn tơnêi têa tơpui tơno ƀă pôa Putin, Kăn xiâm pơkuâ kong têa Rusi

Péa Kăn xiâm pơkuâ mơnhên on tơhrik, hyôh on gas ƀă têa châu têa kơxăng pơtối cho môi tung mâu tơdroăng ki xiâm dêi tơrŭm cheăng ton xŏn tŭm têk, djâ pơxúa păng ‘nâng ăm péa tơnêi têa. Mơgêi hneăng hôp tơpui tơno, pôa Nguyễn Xuân Phúc ƀă pôa Putin hiăng tơbleăng tơdjuôm ‘na troăng tơrŭm cheăng tŭm têk pơla Việt Nam – Rusi troh hơnăm 2030, vâ pơkâ troăng pêi la ngiâ ăm tơrŭm cheăng loi tơngah trâu hơngế pơla péa tơnêi têa tung mâu kơvâ cheăng rế hía rế trâu hơngế, pơxúa ƀă châ tơƀrê, tơxâng pơxúa ton xŏn dêi péa tơnêi têa, hdroâng mơngế, kum tung tơdroăng mơjiâng hơniâp lĕm, kring vế tơniăn ƀă mơnhông mơdêk krá tơniăn a kơpong ƀă lâp plâi tơnêi.

            A Sa Ly tơplôu ƀă tơbleăng