VOV4.Sêdang -Tung hâi pêi cheăng ki apoăng a New York,kong têa Mih, lơ 21/9 tiô chôu kong têa, pôa Nguyễn Xuân Phúc, kăn xiâm hnê ngăn tơnêi têa xuân hiăng ai mâu rôh trâm kăn pơkuâ xiâm mâu kong têa ƀă kăn hnê ngăn Hngêi rak liăn kong têa ê. A rôh trâm pôa Moon Jae-In, kăn xiâm pơkuâ kong têa Hàn Quốc, kăn xiâm pơkuâ kong têa Hàn Quốc rơhêng vâ mơdêk rơdêi tâ nếo tơrŭm cheăng la ngiâ ƀă Việt Nam, mơ-eăm pêi lo liăn châ 100 rơtal dollars a hơnăm 2023, mơdêk tơrŭm cheăng tung mâu kơvâ cheăng kâ kơxô̆, tơmeăm pơkeăng, liăn ngân ƀă hên ki ê.

Tung pơla pơreăng kân COVID-19 tâ tú rơ-iô, pôa Moon Jae-In tối tơbleăng, Chin phuh Hàn Quốc pơkâ kum ăm Việt Nam lối 1 rơtuh klŏng vaccine ƀă kô pơtroh ăm Việt Nam a tơdế khế 10 la ngiâ. A rôh trâm pôa Michael Martin, Ngế pro xiâm hnê ngăn Ireland, kăn hnê ngăn ki pơ’lêh dêi Hô̆i đong kring vế khu lâp kong têa khế 9/2021, kăn xiâm hnê ngăn tơnêi têa pơkâ thế klêi kơ’nâi kâi hbrâ mơdât pơreăng, péa pâ kô rĕng vêh tơdjêp tơdroăng pơtroh mâu kăn ƀă trâm mâu kăn xiâm rêm râ, mơdêk tơrŭm ‘no liăn cheăng tung mâu kơvâ cheăng ki ê.

Xuân tung hâi lơ21/9, kăn xiâm hnê ngăn tơnêi têa pin xuân hiăng ai mâu rôh trâm pơkuâ hneăng hdrối, kăn pơkuâ xiâm mâu kong têa Siam, Bangladesh, Sri Lanka, Latvia, Thụy Điển, Guyana, Lesotho, Costa Rica, Colombia, Uruguay tơpui tơno hên troăng hơlâ ki ai pơxúa vâ mơdêk tơrŭm cheăng ƀă mâu kong têa châ tơƀrê ƀă trâu hngế.

Katarina Nga tơplôu ƀă tơbleăng