VOV4.Sêdang - A Pơlê kong kân Hồ Chí Minh, pôa Nguyễn Xuân Phúc, Kăn xiâm hnê ngăn tơnêi têa nếo ai rôh trâm mâ kuăn pơlê a tơring Củ Chi ƀă Hóc Môn tiô tơdroăng mơ’no tơdrêng tung um tiô troăng hyôh Internet, tối tơbleăng ‘na tơdroăng cheăng hbrâ ăm rôh hôp má 2 Kuô̆k hô̆i hneăng 15. A rôh trâm mâ, mâu kuăn pơlê tối mơnê kơ Đảng, Tơnêi têa, mâu khu ngế tung tơnêi têa ƀă kong têa ê hiăng tơmâng khât, hnê mơhno, tŏng kum pơlê kong kân Hồ Chí Minh plâ mơdât pơreăng vâ kâi mơdât pơreăng môi tiah hâi kố.

Pôa Nguyễn Xuân Phúc, Kăn xiâm hnê ngăn tơnêi têa trâm mâ kuăn pơlê a Pơlê kong kân Hồ Chí Minh

Pôa Nguyễn Xuân Phúc ăm ‘nâi, Khu xiâm kal kí hiăng ai hên hneăng hôp tối tơbleăng hên troăng rơhlâ pêi pro hnê mơhno dêi Chin phuh, Khu hnê mơhno hbrâ mơdât pơreăng, tung mê, ai pơtroh tơdroăng ing “Zero COVID-19” chiâng hmâ tơniăn COVID-19. Tung la ngiâ, Kăn xiâm hnê ngăn tơnêi têa tối tiah kố, vaccine + 5 xuân cho tơdroăng ki kal má môi ing tơdroăng pêi pro hbrâ mơdât pơreăng dêi lâp plâi tơnêi ƀă Việt Nam.

Ƀă Pơlê kong kân Hồ Chí Minh chôa kâi séa ngăn mơdât pơreăng, Kăn xiâm hnê ngăn tơnêi têa tối tiah kố, mâu tơring Củ Chi ƀă Hóc Môn kal thế séa ngăn, tơleăng mơnhên tơdrêng hlối mâu tơdroăng ối tơvâ tơvân vâ tơ’lêi hlâu má môi ăm khu mơdró, Khu pêi cheăng tơrŭm ƀă kuăn pơlê ‘mâi mơnhông pêi cheăng mơjiâng pro tơmeăm, kum kuăn pơlê ai cheăng pêi ƀă châ tơ’mot kơxô̆ liăn pêi lo, tơniăn tung rêh ối pơlê pơla.

Gương tơplôu ƀă tơbleăng