VOV4.Xơ Đăng - Kơxo lơ 20/12, a Hà Nội, Khu pơkuâ ngăn Đảng lêng Tơnêi têa, Khu xiâm pơkuâ ngăn lêng tơkŭm po Rôh hôp Khu xiâm lêng tâi tâng khu lêng ‘no tơdrêng ing troăng hyôh Internet hơnăm 2021 a 141 tíu mơ’no, mơnhên tối klêi kơ’nâi pơkuâ, hnê mơhno pêi pro hnoăng cheăng lêng, gak kring pơlê pơla cheăm bêng hơnăm 2021 ƀă tơbleăng hnoăng cheăng hơnăm 2022.

Pôa Nguyễn Xuân Phúc, kăn xiâm hnê ngăn tơnêi têa tơpui a rôh hôp

Tơpui a rôh hôp, teăng mâ kăn pơkuâ Đảng, Tơnêi têa, Khu pơkuâ ngăn Đảng lêng Tơnêi têa, pôa Nguyễn Xuân Phúc, kăn xiâm hnê ngăn tơnêi têa pơtroh rơkong mơnê troh mâu tươ̆ng lêng, kăn ƀô̆, lêng tung tâi tâng mâu lêng, khu lêng ki hbrâ mơhnhôk, khu lêng kring gak lâp tơnêi têa rơkong kơ-êng ƀă rơkong rơkâu tơniăn lĕm má môi drêng tơbâ 77 hơnăm hâi mơjiâng khu lêng kuăn pơlê Việt Nam.

‘Na hnoăng cheăng hơnăm 2022, kăn xiâm hnê ngăn tơnêi têa pơkâ thế, Khu pơkuâ ngăn Đảng lêng Tơnêi têa, Khu xiâm pơkuâ ngăn lêng kal hriăn ngăn, mơnhên tối nhên tơdroăng; hbrâ rơnáu tâ nếo tung tơdroăng ki tối tơbleăng, tí tăng ‘nâi plĕng tơdroăng tung la ngiâ ‘na lêng, gak kring ăm Đảng, Tơnêi têa; pôi tá ăm tro kơdrâ. Tơrŭm krá tơniăn tung tơdroăng gak kring tơpui kâ, mơdêk hnoăng cheăng tơrŭm ƀă kong têa ê ‘na tơdroăng cheăng lêng.

Katarina Nga tơplôu ƀă tơbleăng