VOV4.Xơ Đăng - Hâi 26/12,  a Hà Nội hiăng po hneăng hôp mâu kăn cheăng ‘na Luât lâp tơnêi têa rôh má 3. Veăng hôp ƀă tơbleăng a hneăng hôp, pôa Nguyễn Xuân Phúc, Kăn xiâm hnê ngăn tơnêu têa khê̆ĕ kơdeăn, tối mâu ngế ngăn ‘na luât tung lâp tơnêi têa hiăng mơ-eăm tơdroăng cheăng, pleăng hnoăng tơná, veăng kring vế tơdroăng ki pơxúa, ƀă hnoăng ki rak tơniăn, môi tuăn dêi kuăn pơlê, hnoăng ki pơxúa troh luât dêi mơngế ki mê, kơ koan, veăng mơnhông cheăng kâ  rêh ối dêi tơnêi têa, ‘mâi hơ’lêh luât, mơjiâng ƀă pê klêi dêi hnoăng cheăng Tơnêi têa tro tiô luât xah hô̆i chuh nghiah Việt Nam.

Pôa Nguyễn Xuân Phúc, Kăn xiâm hnê ngăn tơnêi têa trâm mâ mâu kăn veăng hôp

Kăn xiâm hnê ngăn tơnêi têa ăm ‘nâi, Đảng, Tơnêi têa đi đo tơmâng khât troh tơdroăng mơjiâng mâu ngế cheăng ngăn ‘na luât, mơdêk tá kơxô̆ ƀă tá ki tơ-ƀrê tung tơdroăng cheăng pêi. Luâ tâ ki mê, mơngế ngăn ‘na luât thế cheăng tơniăn krê, tơdrăng, ‘nâi nhoăm tơdroăng ki khât, ki ai khât, râk tro luât tơnêi têa, luât hiăng pơkâ, pêi pro tro tuăn mơno ki lĕm tro tơdroăng cheăng tơná tung pêi cheăng tơleăng mơnhên. ngế ngăn ‘na luât ai hnoăng cheăng pêi kring vế tro mâu mâu tơdroăng ki pơxúa ki tro luât dêi kuăn pơlê, khu tơrŭm, hlối thế kring vế luât pơkâ xah hô̆i chuh ngiah, kring vế ki pơxúa tơxâng dêi Tơnêi têa. 

Gương tơplôu ƀă tơbleăng