VOV4.Xơ Đăng - Tiô rơkong krếo thế dêi Ngế pro xiâm hnê ngăn kong têa New Zealand, pôa Nguyễn Xuân Phúc, Kăn xiâm hnê ngăn tơnêi têa pin kô lăm hôp to mâu kăn APEC roh má 28 sap hâi lơ 11 troh lơ 12/11 tiô tơdroăng hôp mơ’no tiô troăng hyôh internet.

Pôa Nguyễn Xuân Phúc, Kăn xiâm hnê ngăn tơnêi têa veăng hôp mâu kăn xiâm APEC roh má 28

Tung măng tĭng po hôp APEC drêng kố, pôa Nguyễn Xuân Phúc, Kăn xiâm hnê ngăn tơnêi têa  kô veăng hôp hlối tối tơbleăng a hneăng hôp mâu kăn xiâm khu mơdró APEC ƀă veăng  hôp mê ai dâng 4  rơpâu 500 ngế kăn xiâm mâu khu mơdró ki má môi tung kơpong châu Á - Thái Bình Dương; pơtối mê cho hneăng hôp mâu kăn xiâm rơkê ngăn ‘na cheăng kâ châu Á - Thái Bình Dương rôh má 28 ai pơxá “Tơrŭm tung APEC vâ mơdêk ‘mâi mơnhông cheăng kâ drêng hiăng tâi COVID-19; Mâu rôh ƀă pơloăng mơnúa ki ăm hlo tung tơdroăng plâi tơnêi hiăng tâi COVID ƀă pro ti lâi vâ tơniăn ăm mâu hnoăng cheăng pêi pro châ tơbleăng tơdâng tơ’mô troh tâi tâng kuăn pơlê tung pơla nôkố ƀă tung la ngiâ”, tơkŭm tơpui tơno péa tơdroăng ki kal cho tơngah cheăng kâ lâp plâi tơnêi ƀă hlối tơrŭm ‘mâi mơnhông klêi ai pơreăng kân.

Hneăng hôp tơbleăng 2 tơdroăng cho Tơbleăng hneăng hôp mâu kăn xiâm ‘na cheăng kâ châu Á - Thái Bình Dương roh má 28 ƀă Pơkâ tơbleăng tơdroăng mâ ngăn tơdroăng pêi pro APEC troh hơnăm 2040.

Gương tơplôu ƀă tơbleăng