VOV4.Xơ Đăng - Ối tung mâu tơdroăng leh tơbâ 60 hơnăm hâi Pôa Hồ vêh lăm pôu pơlê xiâm roh má 2 (8/12/1961 – 8/12/2021), hâi lơ 12/12, a Kơpong chôu ‘măn tơmeăm khoăng ton nah Kim Liên, cheăm Kim Liên, tơring Nam Đàn, kong pơlê Nghệ An tơkŭm po kân krip Leh tơbâ 60 hơnăm Pôa Hồ vêh pơlê xiâm roh má péa ƀă phiu ro kêi đeăng Hngêi tơbâ Kăn xiâm Hồ Chí Minh tung kơdrum ki chôu ‘măn tơmeăm khoăng ton nah.

Pôa Nguyễn Xuân Phúc, Kăn xiâm hnê ngăn tơnêi têa xông tơpui a roh leh

Xông tơpui a roh leh, pôa Nguyễn Xuân Phúc tối ăm ‘nâi, plâ tơdroăng rêh ối pro kăch măng, Pôa hiăng nhuô̆m tơdroăng tơnêi têa mê iâ vêh a pơlê xiâm.

Hơngế pơlê xiâm sap hơnăm 1906 troh drêng chiâng ngế ối a ko Đảng ƀă Tơnêi têa, Pôa Hồ bu vêh lăm pôu pơlê xiâm châ péa xôh, laga Pôa xuân pơtroh tŭm tơdroăng ki pâ nhuô̆m, tơdroăng ki pâ ing mâu kơthô, ƀai chêh pơtroh pơlê xiâm, mâu roh tơdrêng tơno tá hiâm mơno ƀă kuăn pơlê, kăn ƀô̆, đảng viên kong pơlê Nghệ An.

Kăn xiâm hnê ngăn tơnêi têa mơnhên, Đảng, Tơnêi têa ƀă kuăn pơlê pin xuân troh tá ah pâ vế mâu hnoăng kân kĭn dêi mâu kăn ki mơjiâng, dêi rơpŏng ƀă nhŏng o hdroâng hdrê peăng pâ, peăng nôu dêi Pôa Hồ hiăng mơjiâng, păn roăng, hnê hriâm ngế kuăn ki rơkê păng ‘nâng dêi hdroâng mơngế Việt Nam – Pôa Hồ Chí Minh, Kăn xiâm hnê ngăn tơnêi têa nhuô̆m pâ.

A Sa Ly tơplôu ƀă tơbleăng