VOV4.Xơ Đăng - Kơxê lơ 9/12, a Tíu pêi cheăng Chin phuh, pôa Phạm Bình Minh, Ngế pro xiâm phŏ hnê ngăn tơnêi têa hiăng pơkuâ po rôh hôp tơpui tơno ‘na túa pơkâ ‘mâi mơnhông mâu rôh tơƀai kơneăng ngi kong têa ê sap ing hâi lơ 15/12 tiô tơdroăng pơkâ mơ’no dêi Khu xiâm ngăn troăng prôk ƀă rơxế kơtâu. Khu xiâm ngăn troăng prôk ƀă rơxế kơtâu pơkâ mơ’no 2 hneăng ki pơkâ ‘mâi mơnhông mâu rôh kơneăng tiah hmâ chơ tơmối kong têa mot tung Việt Nam.

Pôa Phạm Bình Minh tối tiah kố, kal rah xo mâu kong têa ki tơniăn. Tơmối mot tung Việt Nam a mâu rôh kơneăng athế rak vế, pêi pro tro tơdroăng pơkâ ‘na hbrâ mơdât pơreăng; pâk tŭm 2 trum vaccine, lơ hiăng pơlât prêi COVID-19, ai séa ngăn PCR âm tĭnh tung pơla 72 chôu hdrối vâ to tung tơƀai. Ngế pro xiâm phŏ hnê ngăn tơnêi têa xuân pơkâ thế kal ai môi phần mềm chêh tối inâi xúa ăm mâu ngế ki mot tung tơnêi têa vâ pro tơlêi hlâu ăm tơdroăng ki hbrâ mơdât pơreăng.

Nga tơplôu ƀă tơbleăng