VOV4.Xơ Đăng - Kơxo lơ 22/12, pôa Phạm Bình Minh, Ngế cheăng tung tíu xiâm kal kí, Ngế pro xiâm phŏ hnê ngăn má môi Chin phuh rơtế ƀă khu kăn ki pêi dêi hnoăng cheăng hiăng troh pôu, hbru tơmeăm ƀă rơkâu Hâi tĭng kân Noel a Hngêi Pâ Xeăng xiâm Huế; pôu ƀă rơkâu Hâi tĭng kân a tơring khôp Phủ Cam Huế. Teăng mâ kăn pơkuâ Đảng ƀă Tơnêi têa, pôa Phạm Bình Minh rơkâu ivá, diâp tơmeăm ƀă kơpâu reăng rơkâu hâi tĭng kân Noel kơ ƀok xối kân Nguyễn Chí Linh, Ƀok xối kân Giáo phận Huế, Kăn hnê ngăn Hô̆i đong Giám mục Việt Nam; Rơkâu mâu ƀok xôi, jâ chĭng ki khôp Pâ Xeăng ƀă tâi tâng kuăn pơlê ki tiô khôp Giáo phận Huế tơdah hâi Tĭng kân Noel hơniâp ro ƀă hơnăm nếo 2022 tơniăn lĕm.

 Tơdrêng amê, hlối rơhêng vâ mâu ƀok xối, jâ chĭng ƀă kuăn pơlê khôp Pâ Xeăng pơtối mơdêk khôi hmâ pâ nhuô̆m tơnêi têa, rơtế ƀă hdroâng kuăn ngo,mơdêk mâu tơdroăng ki hiăng pêi pro klêi, pôu râng tơdroăng cheăng ƀă kuăn pơlê, veăng kum hên tâ nếo tung tơdroăng mơjiâng môi tơnêi Việt Nam xua môi tơdroăng ki xiâm cho kuăn pơlê mơdrŏng, tơnêi têa rơdêi, tơniăn krê, tơdâng tơ’mô, rơkê plĕng.

Katarina Nga tơplôu ƀă tơbleăng