VOV4.Sêdang - Kơxê lơ 5/9, pôa Phạm Minh Chính, Ngế pro xiâm hnê ngăn Chin phuh, Kăn xiâm pơkuâ hnê mơhno tơnêi têa hbrâ, mơdât pơreăng COVID-19 hiăng pơkuâ hôp mơ’no tơdrêng tung um tiô troăng măng Internet Lâp tơnêi têa Khu hnê mơhno tơnêi têa hbrâ mơdât pơreăng COVID-19 ƀă mâu kong pơlê ‘na hbrâ mơdât pơreăng COVID-19. Roh hôp châ tơdjêp ƀă lối 9 rơpâu tíu hrik hyôh um a mâu cheăm, bêng, pơlê kân; tơring, pơlê kong krâm, kong pơlê, pơlê kong kơdrâm tung lâp tơnêi têa.

Ngế pro xiâm hnê ngăn tơnêi têa tối nhên, roh hôp tơpui tơdroăng hbrâ mơdât pơreăng a cheăm, bêng, pơlê kân ƀă tối trâu hơngế troh tơdroăng drêng pêi pro klâ kơtăn pơlê pơla mê cheăm, bêng, pơlê kân thế pêi pro ki klâi, kuăn pơlê thế pro ki klâi. Tơbleăng a roh hôp, pôa Nguyễn Thành Long, Ngế xiâm pơkuâ ngăn pơkeăng ƀă khăm pơlât tối ăm ‘nâi, tơdroăng pơreăng xông tâ tú ó, roh pơreăng má 4 pơxiâm sap hâi lơ 27/4/2021 troh hâi lơ 5/9/2021, châ hlo lối 520 rơpâu ngế tro tâ pơreăng, vâ chê 289 rơpâu ngế hiăng prêi lĕm (55%) ƀă vâ chê 13 rơpâu ngế hlâ; Lâp tơnêi têa hiăng pâk vaccine châ lối 21 rơtuh 500 rơpâu kung kếo pơkeăng, châ vâ chê 30% kơxô̆ mơngế sap ing 18 hơnăm tơngi klêng.

Tơdroăng tơkŭm pêi pro xuân cho ki xiâm, ki má lối cho a mâu pơlê, cheăm, bêng.

A roh hôp, Ngế pro xiâm hnê ngăn tơnêi têa pơkâ tơdjêp ôh tá tối hdrối ƀă hên khu râ kăn pơkuâ cheăm, bêng, pơlê kân, tơring ai pơreăng xông tâ tú ó tung lâp tơnêi têa. Ngế ối a ko Chin phuh pơtối séa ngăn ngế ki ối a ko ‘nâi nhên ‘na tơdroăng pơreăng, troăng hbrâ mơdât pơreăng, mâu troăng tơmiât pêi hnê mơhno dêi Tơnêi têa ƀă pơtối kơ-êng ‘na tơdroăng pơlât mâu ngế F0, tơdroăng khăm pơlât, khăm ngăn, rak tơniăn tơdroăng rêh ối pơlê pơla.

A Sa Ly tơplôu ƀă tơbleăng