VOV4.Sêdang - Kơxê lơ 3/11, Leh tơdah pôa Phạm Minh Chính, Ngế pro xiâm hnê ngăn Chin phuh rơtế khu râ kăn xiâm Việt Nam lăm pôu pêi cheăng a kong têa Pơhlăng hiăng tơkŭm po a Hngêi Invalides a pơlê kong xiâm Paris. Klêi kơ’nâi leh tơdah păng ‘nâng, pôa Phạm Minh Chính hiăng trâm mâ tơpui tơno ƀă Kăn xiâm hnê ngăn Kuô̆k hô̆i râ má môi kong têa Pơhlăng Gérard Larcher. Kăn xiâm hnê ngăn Kuô̆k hô̆i râ má môi kong têa Pơhlăng tối phiu ro ‘na tơdroăng Việt Nam hiăng châ tơƀrê tung tơdroăng pơ’lêh cheăng kâ, rak kơlo mơnhông tơtêk rĕng, laga tơdrêng amê xuân rak khôi túa lĕm tro dêi tơná.

Pôa Phạm Minh Chính, Ngế pro xiâm hnê ngăn Chin phuh lăm pôu pêi cheăng kong têa Pơhlăng

Pôa Phạm Minh Chính kheăn kơdeăn mâu tơdroăng veăng kum ki kal dêi kơ koan Kuô̆k hô̆i râ má môi péa tơnêi têa tung tơdroăng thăm tơrŭm cheăng hên troăng Việt Nam – Pơhlăng. Péa pâ xuân hiăng tơpui tơno ‘na mâu tơdroăng kơpong ƀă lâp plâi tơnêi rơhêng vâ ‘nâi plĕng, tung mê ai tơdroăng têa kơxĭ Biển Đông ƀă tối rơdêi mâu kong têa kal veăng tơlo tung tơdroăng rak hơniâp lĕm, tơniăn ƀă mơnhông tơtêk kro mơdrŏng.

Kơ’nâi mê, pôa Phạm Minh Chính, Ngế pro xiâm hnê ngăn tơnêi têa ƀă pôa Jean Castex, Ngế pro xiâm hnê ngăn kong têa Pơhlăng hiăng châ hlo leh kĭ mâu tơdroăng tơkêa tơrŭm cheăng pơla mâu kơ koan ƀă khu tê mơdró péa tơnêi têa.

            A Sa Ly tơplôu ƀă tơbleăng