VOV4.Xơ Đăng - Kơxo lơ 10/12, pôa Phạm Minh Chính, Ngế pro xiâm hnê ngăn Chin phuh Ngế xiâm hnê mơhno tơnêi têa hbrâ mơdât pơreăng COVID-19 (Khu hnê mơhno) pơkuâ hôp mơ’no  tiô troăng hyôh Internet tung lâp tơnêi têa Khu hnê mơhno tơnêi têa ƀă Khu hnê mơhno dêi 63 to kong pơlê, pơlê kong kân ‘na tơdroăng hbrâ mơdât pơreăng COVID-19. Tơpui a rôh hôp, pôa Phạm Minh Chinh tối nhên, to lâi hâi ki kố, pơreăng tâ tú rơ-iô, ai hên ngế tâ tú tung kuăn pơlê, ai ngế ki ‘nâ tâ tú ó ƀă hlối hlâ, hneăng hôp mê tơpui tơno tơkŭm a 8 khu tơdroăng cheăng ki kal, thế tơbleăng troăng rơhlâ nhên khât, ing mê, tơniăn môi tuăn ing mâu khu hnê mơhno dêi mâu kong pơlê, mâu tơring troh cheăm ‘na pơkâ, troăng vâ pêi; tơdroăng cheăng, plâ mơdât pơreăng kal thế pêi kơtăng khât, tro tiô khoa hok, tơtro, tơ-ƀrê.

Ngế pro xiâm hnê ngăn tơnêi têa tối nếo pơkâ ki hrá má môi lơ 31/12 thế pâk tŭm péa trum ăm mâu ngế ki sap 18 hơnăm tơngi klêng, pâk trum má 3 ăm mâu ngế kal thế pâk. Mâu cheăm tơring pơkâ troăng rơhlâ hnê tối mơdêk ki hlê plĕng dêi kuăn pơlê, rak ngăn kuăn pơlê tung rôh Têt Dương lịch ƀă âm lịch vâ ga châ tơniăn.

Gương tơplôu ƀă tơbleăng