VOV4.Sêdang - Kơmăng lơ 12/9, a tíu pêi cheăng Chin phuh, pôa Phạm Minh Chính, Ngế pro xiâm hnê ngăn Chin phuh hiăng pơkuâ leh mơhnhôk tơdroăng ‘’Hyôh măng ƀă kơmăi tĭnh ăm o’’ tiô troăng mơ’no tơdrêng tung um tiô troăng măng Internet ƀă 63 kong pơlê, pơlê kong kơdrâm. Tơdroăng kố vâ mơjiâng troăng tŏng kum mâu hngêi trung, thái cô, hok tro, sinh viên châ xúa kơmăi vi tĭnh, ai hyôh măng Internet têi tơniăn, tơ’lêi xúa vâ tơniăn tơdroăng hnê ƀă hriâm; mơhnhôk, tŏng kum kơmăi vi tĭnh, mâu tơmeăm kŏng nghê̆, xiâm rêi kŏng ngê̆, troăng măng Internet ăm hok tro, sinh viên kơpong hơngế hơngo, mâu rơpŏng kơtiê a mâu tơring, cheăm dế pêi pro klâ kơtăn tiô pơkâ kơxô̆ 16/CT-TTg ƀă pêi pro hriâm mơ’no tơdrêng tung um tơvi.

Ngế pro xiâm hnê ngăn tơnêi têa mơhnhôk Tơdroăng ‘’Hyôh măng ƀă kơmăi tĭnh ăm o’’

Pôa Phạm Minh Chính, Ngế pro xiâm hnê ngăn Chin phuh mơnhên, môi tung mâu hnoăng cheăng ki xiâm dêi Chin phuh nôkố cho rĕng djâ tơdroăng rêh ối tơniăn tiah hmâ nếo tiô troăng tơniăn ƀă hbrâ mơdât pơreăng.

A Sa Ly tơplôu ƀă tơbleăng