VOV4.Xơ Đăng - Kơxê lơ 16/12, a Tíu pêi cheăng Chin phuh, pôa Phạm Minh Chính, Ngế pro xiâm hnê ngăn tơnêi têa, kăn pơkuâ Khu hnê mơhno cheăng tơnêi têa ‘na hbrâ mơdât pơreăng COVID-19 pơkuâ po rôh hôp ‘no tơdrêng ing troăng hyôh Internet ƀă 63 to kong pơlê, pơlê kong kân vâ mơnhên tối tơdroăng ƀă troăng hlo troăng hơlâ pêi pro ki nhên vâ kơdroh kơxô̆ ngế ki pơhlêh chiâng râ, hlâ hía, mơdêk rĕng tơdroăng ki pâk vaccine, mơdêk tơdroăng ki mơjiâng pro tíu khăm pơlât mâ kong pơlê.

Kố cho rôh hôp châ tơkŭm po tung pơla túa pơreăng Omicron tâ tú ki WHO tối tơbleăng gá tâ tú rĕng, rơ-iêo tá hâi chiâng mơnhên tối tâi, xua mê krếo thế lâp plâi tơnêi pơtối hbrâ kơchăng, pôi tá tơngôu. Pôa Phạm Minh Chính tối nhên, nôkố, pơreăng tâ tú tung tơnêi têa xuân ối ôh tá tơniăn; a mâu kong pơlê, ai kơxô̆ ngế hlâ tá hâi kâi hbrâ mơdât; xua mê, mâu kong pơlê, tíu pêi cheăng kal pơtối tơpui tơno, mơnhên tối tung lâp tơnêi têa vâ pơkâ mơ’no mâu troăng hơlâ pêi pro nhên, pêi pro ai pơxúa vâ hbrâ mơdât mâu ngế ki tâ tú tung kuăn pơlê, malối cho ƀă mâu ngế ki pơ’lêh chiâng râ, kâi hbrâ mơdât ‘na kơxô̆ ngế hlâ. Tiô pôa Phạm Minh Chính, kal tơkŭm tơpui tơno troăng hơlâ mơdêk pâk vaccine ăm vâi hdrêng sap ing 12 troh 18 hơnăm vâ mâu vâi o châ vêh hriâm a hngêi trung. Mâu kong pơlê, pơlê kong kân pêi pro mâu troăng hơlâ hbrâ mơdât pơreăng tơtro, rak tơniăn mơjiâng pro, tê mơdró kế tơmeăm.

Katarina Nga tơplôu ƀă tơbleăng