VOV4.Sêdang - Drêng Hâi mơdró kâ Việt Nam lơ 13/10, pôa Phạm Minh Chính, Ngế pro xiâm hnê ngăn Chin phuh nếo ai kơthô pơtroh ăm mâu khu mơdró kâ tung lâp tơnêi têa. Tung kơthô, Ngế pro xiâm hnê ngăn tơnêi têa hlê plĕng, veăng hơlêm, tơmâng ƀă kô pơtối ai mâu troăng hơlâ tŏng kum vâ mâu khu mơdró kâ tơkâ luâ xơpá, mơ-eăm prôk hngế tâ nếo ƀă dế mơjiâng tơdroăng ‘mâi mơnhông, mơdêk cheăng kâ rêh ối pơlê pơla, tơtro tơniăn, rơkê, séa ngăn tơƀrê pơreăng COVID-19. Tơdrêng amê hnối tơbleăng mâu troăng hơlâ khăm pơlât tiô túa ki rơkê plĕng khoa hok, rak tơniăn, tơtro, tơƀrê, malối cho tơdroăng ki pâk vaccine, tŏng kum khu mơdró kâ vâ khu mơdró kâ rĕng ‘mâi mơnhông pêi cheăng kâ, tê mơdró, ăm tơdroăng rêh ối vêh tiah hmâ.

Chin phuh ƀă mâu kơ koan ai hnoăng pơkuâ  kô mơdêk hơ’lêh tơdroăng pơkâ, pơkâ tơleăng mâu tơdroăng ki xơpá, tơvâ tơvân, mơhnhôk mâu kơxô̆ liăn, hơ’lêh chêh pro hlá mơ-éa ƀă hên ki ê pro tơdroăng ki tê mơdró kâ tơniăn, tơdâng tơ’mô vâ khu mơdró kâ mơnhông ƀă tơrŭm cheăng ƀă kong têa ê. Drêng kố, Chin phuh ƀă Kuăn pơlê Việt Nam xuân tơmâng xo tơdroăng ki tŏng kum, rơtế prôk dêi mâu khu mơdró kâ, khu mơdró kâ kong têa ê hiăng veăng kum ăm tơdroăng mơnhông mơdêk cheăng kâ rêh ối Việt Nam xuân môi tiah hbrâ mơdât pơreăng.

Katarina Nga tơplôu ƀă tơbleăng