VOV4.Xơ Đăng - Kơxo lơ 9/11, a Tíu pêi cheăng Chin phuh, pôa Phạm Minh Chính, Ngế pro xiâm hnê ngăn tơnêi têa hiăng tơdah tơpui tơno ƀă kăn xiâm tơpui kâ kong têa Australia cho jâ Marise Payne drêng lăm pôu, pêi cheăng a Việt Nam. Poâ Phạm Minh Chính rơkâu mâu tơdroăng ki pêi pro kân kĭn dêi Chin phuh ƀă kuăn pơlê Australia hiăng pêi klêi tung tơdroăng hbrâ mơdât pơreăng kân COVID-19 ƀă ‘mâi mơnhông cheăng kâ tung pơla hdrối kố nah; mơnê Chin phuh Australia hiăng tơhrâ tŏng kum 5,2 rơtuh klŏng vaccine ăm Việt Nam ƀă púi vâ peăng Australia pơtối rơtế ƀă Việt Nam tung hbrâ mơdât pơreăng ƀă ‘mâi mơnhông cheăng kâ rêh ối pơlê pơla ƀă hên tơdroăng ki ê.

Ngế pro xiâm hnê ngăn tơnêi têa mơnhên tối khât klêi kơ’nâi Rôh hôp Khu kăn xiâm tơpui kâ rôh má 3 pơla péa kong têa, tối kố cho tơdroăng ki mơhno ăm ivá mơ-eăm dêi péa tơnêi têa tung mơdêk tơrŭm cheăng tung la ngiâ. Pôa Phạm Minh Chính pơkâ thế peăng Australia pơtối rak vế tŏng kum mơnhông khât ăm Việt Nam ƀă séa ngăn lôu péa kơchơ mơdró ăm mâu kế tơmeăm pêi lo ing chiâk deăng – ká xi xŏng tê ngi kong têa ê dêi Việt Nam xuân môi tiah séa ngăn tơbleăng tơdroăng ki hbru theh visa ‘na pêi chiâk deăng ăm mâu ngế pêi cheăng Việt Nam; mơhnhôk khu mơdró kâ péa tơnêi têa ‘no liăn tê mơdró.

Katarina Nga tơplôu ƀă tơbleăng