VOV4.Sêdang - Kơxê lơ 01/11,  a kong têa Ănglê, pôa Phạm Minh Chính, Ngế pro xiâm hnê ngăn Chin phuh hiăng veăng hôp ai ƀai tối tơbleăng ki kal tung hâi apoăng dêi hneăng hôp kân tơpui ‘na hyôh kong prâi hơ’lêh châ tơkŭm po tung pơla Hôp rôh má 26 rêm pâ veăng hôp tơpui tơdroăng ki tơhrâ pơkâ dêi khu lâp kong têa ‘na Hyôh kong prâi hơ’lêh (COP26). Ngế pro xiâm hnê ngăn Chin phuh tối nhên hbrâ ví ƀă hyôh kong prâi hơ’lêh, ‘mâi mơnhông chiâng tơdroăng pêi pro ahdrối tung mâu tơdroăng pơkâ mơnhông mơdêk, cho tơdroăng pơkâ ‘na  thế ai tuăn lĕm má môi dêi rêm râ, kơvâ cheăng, mâu khu mơdró ƀă kuăn pơlê.

Pôa Phạm Minh Chính, Ngế pro xiâm hnê ngăn Chin phuh tối tơbleăng a hneăng hôp

Ngế pro xiâm hnê ngăn tơnêi tối tiah kố, tŭm tơdroăng pêi pro thế ngăn a ki chiâng xêh ƀă xo kuăn pơlê pro xiâm, ôh tá ăm ai lôi pa rŏng. Mơgêi ƀai pơchuât, Ngế pro xiâm hnê ngăn tơnêi tối Việt Nam dế mơ-eăm vâ hbrâ ví ƀă hyôh kong prâi hơ’lêh, hlối mơnhông cheăng kâ, vâ tơniăn tung tơdroăng rêh ối rêm hâi rế tro tâ ăm kuăn pơlê.

Việt Nam púi vâ mơdêk tơrŭm cheăng ƀă lâp plâi tơnêi tung mâu tơdroăng cheăng, tơdroăng tơkêa ‘no liăn mơjiâng pro tơmeăm khoăng ƀă mơnhông mơdêk krá tơniăn tung la ngiâ.

Gương tơplôu ƀă tơbleăng