VOV4.Xơ Đăng - Kơxê lơ 19/11, pôa Phạm Minh Chính, Ngế pro xiâm hnê ngăn tơnêi têa ƀă mâu kăn Kuô̆k hô̆i ối tung khu kăn Kuô̆k hô̆i Pơlê kong kân Cần Thơ trâm mâ kuăn pơlê a Pơlê kong kân Cần Thơ. A rôh trâm mâ kuăn pơlê, tiâ rơkong pâ thế dêi kuăn pơlê, pôa Phạm Minh Chính tơbleăng troh kuăn pơlê Cần Thơ tơdroăng ki tâ tú dêi pơreăng tung lâp plâi tơnêi ƀă tung tơnêi têa.

Pakĭng mê, Ngế pro xiâm hnê ngăn tơnêi têa hiăng tiâ mâu khu tơrŭm ki nhên vâ pêi pro châ tiô tơdroăng ki tơkôm dêi kuăn pơlê. Malối cho ‘na tơdroăng ki pâ thế pơkâ tơleăng kế tơmeăm ôh tá xê khât, kế tơmeăm ki roê ‘mot ôh tá tro luât, Ngế pro xiâm hnê ngăn tơnêi têa ăm ‘nâi Chin phuh kô khŏm mơ-eăm pro rơdêi tơdroăng kố, Pơkâ tơdroăng 98, pơkâ hên tơdroăng ki ‘mot tơ’nôm tơdroăng ki pơxâu phak, pơkâ thế mâu khu pơkuâ, pơxâu phak kơtăng tiô luât, pơkâ thế mâu khu ki ai tơdjâk troh veăng hnê khĕn, rak ngăn krá tơniăn, pro rơdêi tâ, pơkâ tơleăng tơƀrê tâ.

Katarina Nga tơplôu ƀă tơbleăng