VOV4.Sêdang - Tiô rơkong krếo thế dêi pôa Samdech Techo Hun Sen, Ngế pro xiâm hnê ngăn kong têa Kul, hâi lơ 9/9/2021, pôa Phạm Minh Chính, Ngế pro xiâm hnê ngăn tơnêi têa hiăng veăng ƀă xông tơpui ki kal a Hneăng hôp khu râ kăn xiâm Tơrŭm cheăng kơpong Mekong po rơdâ (GMS) roh má 7 châ tơkŭm po tiô troăng mơ’no tơdrêng tung um tiô troăng măng internet. Veăng Hneăng hôp ai Ngế pro xiâm hnê ngăn mâu kong têa Kul, Lếo, Siam, Sinuâ, Việt Nam; kăn teăng mâ kong têa Myanmar, Kăn xiâm hnê ngăn Hngêi arak liăn Mơnhông mơdêk châu Á (ADB); ƀă vâ chê 350 kăn teăng mâ mâu Khu xiâm, kơvâ cheăng tơdrốu kong têa, mâu khu tơrŭm cheăng mơnhông mơdêk ƀă khu tê mơdró tung tơnêi têa ƀă kơpong.

Ƀă dó inâi ‘’Thăm mơnhông ivá ó rơdêi vâ trâm ƀă mâu tơdroăng pơloăng mơnúa dêi chât hơnăm nếo’’, Hneăng hôp khu râ kăn xiâm Tơrŭm cheăng kơpong Mekong po rơdâ hiăng séa ngăn tơdroăng tơrŭm cheăng sap ing Hneăng hôp roh má 6 tơkŭm po a khế 3/2018 ƀă tơpui tơno troăng tơrŭm cheăng tung chât hơnăm nếo xuân môi tiah mâu troăng pêi vâ tơkâ hluâ hneăng ki pá puât nôkố.

‘Na pơkâ troăng tơrŭm cheăng hneăng nếo, Hneăng hôp tơbleăng ăm pêi pro ‘’Pơkâ hbrâ mơdât pơreăng COVID-19 ƀă mơnhông dêi hneăng hơnăm 2021 – 2023’’ ƀă ‘’Troăng ton xŏn Tơdroăng tơrŭm cheăng kâ 2030’’. Pơtối mê, mâu khu râ kăn pơkuâ hiăng pơkâ mơ’no troăng pêi la ngiâ troh hơnăm 2030 ‘na môi kơpong tơrŭm cheăng, kro mơdrŏng ƀă mơnhông mơdêk krá tơniăn ƀă tâi tâng.

Mơgêi hneăng hôp, mâu khu râ kăn pơkuâ hiăng tơbleăng tơdjuôm dêi Hneăng hôp ƀă môi tuăn tơkŭm po hneăng hôp GMS 8 a kong têa Sinuâ a hơnăm 2024.

A Sa Ly tơplôu ƀă tơbleăng