VOV4.Xơ Đăng - Tiô rơkong krếo thế dêi pôa Samdech Hunsen, Ngế pro xiâm hnê ngăn kong têa Kul, mê pôa Phạm Minh Chính, Ngế pro xiâm hnê ngăn Chin phuh hiăng pơkuâ khu kăn Việt Nam veăng hôp a Rôh hôp khu kăn xiâm Hneăng hôp Tơrŭm châu Á, châu Âu (ASEM) rôh má 13 tơkŭm po sap ing hâi lơ 25 troh lơ 26/11/2021 tiô tơdroăng ki po ing troăng hyôh Internet. Kố cho tơdroăng ki kal má môi dêi rôh hôp tơrŭm cheăng ASEM tung 3 hơnăm hdrối nah ƀă po klăng a rôh tơbâ 25 hơnăm hâi mơjiâng Hneăng hôp (1996 - 2021).

Ƀă inâi “ ‘Mâi mơnhông chuh ngiah hên troăng xua mơdêk tơdjuôm”, mâu kăn pơkuâ ASEM hiăng tơpui ‘na mâu ivá mơ-eăm tơdjuôm ƀă tơrŭm hên troăng tung pơkâ tơleăng mâu tơdroăng pơloăng mơnúa tung kơpong ƀă tung lâp plâi tơnêi, hbrâ mơdât pơreăng kân COVID-19, mơdêk ‘mâi mơnhông cheăng kâ krá tơniăn ton, tâi tâng ƀă mơdêk tơrŭm pơlê pơla ƀă mơhno túa lĕm tro.

Mâu kăn pơkuâ xuân tối ‘na tơdroăng tối tơbleăng túa tơmiât ‘na tơdroăng kal kí, cheăng kâ rêh ối pơlê pơla a péa kơpong ƀă tơpui ‘na mâu túa pơkâ vâ mơdêk tâ nếo tơrŭm cheăng ASEM.

Katarina Nga tơplôu ƀă tơbleăng