VOV4.Sêdang -Xuân tung rôh lăm veăng hôp a Rôh hôp COP26, a kong têa Ănglê, pôa Phạm Minh Chính, Ngế pro xiâm hnê ngăn tơnêi têa hiăng ai rôh pêi cheăng ƀă kăn xiâm pơkuâ Grup AstraZeneca ƀă châ hlo mâu leh kĭ tơkêa ƀă tơbleăng mâu tơdroăng tơkêa tơrŭm cheăng pơla AstraZeneca ƀă peăng việt Nam. AstraZeneca kô ‘no 2 rơpâu rơtal (90 rơtuh dollars) vâ kum Việt Nam mơdêk ivá mơjiâng pro pơkeăng tung tơnêi têa, kum mâu ngế ki tâ pơreăng châ xúa tơ’lêi hlâu tâ ƀă mâu pơkeăng ki dâi lĕm châ mơjiâng pro a Việt Nam.

Pôa Phạm Minh Chính, Ngế pro xiâm hnê ngăn pêi cheăng ƀă kăn pơkuâ Grup AstraZeneca

Tơpui a rôh pêi cheăng, pôa Phạm Minh Chính mơnê Grup AstraZeneca hiăng kum vaccine teăm tơdrêng ăm Việt Nam tung pơla hdrối kố nah, kơnôm mê hiăng veăng kum tung tơdroăng ki hbrâ mơdât pơreăng COVID-19; veăng kum tung tơdroăng rak vế, rak ngăn ivá châ chăn kuăn pơlê. Ngế pro xiâm hnê ngăn tơnêi têa rơhêng vâ AstraZeneca rĕng pơcháu tâi mâu vaccine ki u ối ki hiăng tơhrâ ăm Việt Nam tro hâi khế; tối nhên, Việt Nam rơhêng vâ tơrŭm cheăng la ngiâ ƀă AstraZeneca ton xŏn, rak tơniăn tung kring vế, khăm pơlât tung tơdroăng ki lâp plâi tơnêi dế ôh tá tơniăn xua kong prâi pro hơ’lêh ƀă pơreăng xông tâ tú.

Katarina Nga tơplôu ƀă tơbleăng