VOV4.Xơ đang - Kơxê lơ 22/12, pôa Phạm Minh Chính, Ngế pro xiâm hnê ngăn Chin phuh hiăng pêi cheăng ƀă khu râ pơkuâ kong pơlê Quảng Bình. Klêi kơ’nâi tơmâng mâu rơkong tơpui dêi mâu khu xiâm, kơvâ cheăng Tơnêi têa ƀă khu râ kăn pơkuâ kong pơlê Quảng Bình, pôa Phạm Minh Chính kheăn kơdeăn mâu tơdroăng châ tơƀrê ki kong pơlê Quảng Bình hiăng châ tơƀrê tung pơla kố nah. Ngế pro xiâm hnê ngăn tơnêi têa tối nhên, hơnăm 2021, mơhé trâm hên pá puât, pơloăng mơnúa laga Đảng ƀô̆, khu râ kăn pơkuâ ƀă kuăn pơlê Quảng Bình hiăng mơ-eăm, châ tơƀrê hên.

Ngế pro xiâm hnê ngăn tơnêi têa pêi cheăng ƀă khu râ kăn pơkuâ kong pơlê Quảng Bình

Ngế pro xiâm hnê ngăn tơnêi têa tối nhên, hơnăm 2022 xuân cho hơnăm ki kal vâ pêi pro Pơkâ hneăng hôp má XIII ƀă Hneăng hôp Đảng mâu khu râ. Pơkâ xiâm cho thế mơnhông mơdêk krá tơniăn, mơnhông mơdêk trâu hơngế tơdroăng rêh ối ‘na hiâm mơno, tơmeăm khoăng dêi kuăn pơlê thế rak tơniăn cheăng kal kí, tơniăn cheăng lêng ƀă tiô tơmeăm ki ai phá tơ-ê. Ngế pro xiâm hnê ngăn tơnêi têa pơkâ kong pơlê Quảng Bình mơdât pơreăng châ tơƀrê, thâ chiâng pơkâ pâk vaccine trum má 2 ăm mơngế sap ing 18 hơnăm tung khế 12, pêi kêi đeăng hnoăng cheăng má 3 tung pái khế apoăng hơnăm 2022.

A Sa Ly tơplôu ƀă tơbleăng