VOV4.Sêdang - Pơtối tơdroăng roh lăm pôu pêi cheăng a kong têa Kŏng hoa Pơhlăng, hâi lơ 5/11, pôa Phạm Minh Chính ƀă khu râ kăn xiâm Việt Nam hiăng troh lăm pôu, pêi cheăng ƀă Viê̆n Pasteur Paris. Khu râ kăn pơkuâ Viê̆n Pasteur Paris tối ăm ‘nâi tung kơxô̆ mâu kong têa ai tơrŭm cheăng ƀă Viê̆n, Việt Nam ai hnoăng ki kal păng ‘nâng. Xông tơpui a roh pêi cheăng, Ngế pro xiâm hnê ngăn tơnêi têa tối nhên, kố cho tíu ki khu râ kăn Việt Nam kal troh tung roh pêi cheăng roh kố, pơtối thăm tơrŭm cheăng ƀă mâu Viê̆n Pasteur.

Pôa Phạm Minh Chính, Ngế pro xiâm hnê ngăn tơnêi têa pêi cheăng ƀă Viê̆n Pasteur Paris 

Mâu hngêi pơkeăng mâu Viê̆n Pasteur cho môi tơdroăng ‘’pro tơhmâ’’ pơla Việt Nam ƀă Pơhlăng. Tung lâp plâi tơnêi, iâ ai kong têa ki lâi ai troh 3 Viê̆n Pasteur môi tiah Việt Nam, ối a tŭm 3 kơpong peăng kơnhŏng, peăng tơdế tơnêi têa, peăng hdroh tơnêi têa, ăm hlo troăng tơmiât pêi ton xŏn dêi mâu ngế prôk hdrối. Xuân tung hâi lơ 5/11, pôa Phạm Minh Chính, Ngế pro xiâm hnê ngăn Chin phuh hiăng troh lăm pôu tíu pêi cheăng Khu tơrŭm hnê hriâm, khoa hok ƀă mơhno túa lĕm tro dêi Khu lâp kong têa (UNESCO) pro a Paris, Pơhlăng ƀă trâm mâ tơpui tơno ƀă jâ Audrey Azoulay, Kăn xiâm pơkuâ UNESCO.

Kơxê măng lơ 5/11, pôa Phạm Minh Chính, Ngế pro xiâm hnê ngăn Chin phuh hiăng lo vêh ing Paris, mơgêi lĕm tro tâi tâng tơdroăng lăm pôu pêi cheăng kong têa Kŏng hoa Pơhlăng.

A Sa Ly tơplôu ƀă tơbleăng