VOV4.Xơ Đăng - Klăng roh hâi tĭng kân Pâ Xeăng chu chiâng kuăn mơngế hơnăm 2021, kơxê lơ 17/12, pôa Phạm Minh Chính, Ngế pro xiâm hnê ngăn Chin phuh hiăng lăm pôu, rơkâu Noel 2021 mâu ƀok xối, jâ chĭng, kuăn khôp Pâ Xeăng a kong pơlê Bà Rịa Vũng Tàu. Lăm pôu Tơring khôp Long Hương ƀă lăm pôu Hngêi Pâ Xeăng kân kong pơlê Bà Rịa Vũng Tàu, pôa Phạm Minh Chính pói vâ kuăn pơlê tiô khôp Pâ Xeăng pơtối mơnhông mơdêk hiâm mơno ‘’Nhuôm Pâ Xeăng, pâ tơnêi têa’’, pêi tiô pơkâ pêi, troăng hơlâ, luât dêi Đảng ƀă Tơnêi têa, mơ-eăm xông tơtêk vâ ai tơdroăng rêh ối rế hía rế phâi hơtô, hơniâp lĕm, rŭm môi tuăn, pâ dêi pó, tŏng kum dêi pó, kum mơjiâng pơlê xiâm, tơnêi têa rế hiá rế mơnhông mơdêk.

Pôa Phạm Minh Chính, Ngế pro xiâm hnê ngăn tơnêi têa rơkâu Noel 2021 ƀok xối, jâ chĭng, kuăn khôp Pâ Xeăng a kong pơlê Bà Rịa Vũng Tàu 

Ngế pro xiâm hnê ngăn tơnêi têa xuân pơkâ khu râ kăn pơkuâ hnê ngăn cheăng Đảng, khu râ kăn pơkuâ rak ngăn tơdroăng pâk vaccine ƀă pơkâ thế ƀok xối mơhnhôk kuăn khôp tối krê ƀă kuăn pơlê tối tơdjuôm thăm pâk vaccine, xua ivá, châ tơná ƀă pơlê pơla. Tơdrêng amê, pêi pro kơtăng mâu troăng hbrâ mơdât pơreăng môi tiah 5K, mơdêk ki hlê plĕng dêi kuăn pơlê.

A Sa Ly tơplôu ƀă tơbleăng